Թաթուլ Մանասերյան. Մի շարք ոլորտներում երկնիշ աճ ունենալու կարողություններ կան

«Ձմռան ամիսները չեն կարող լինել ակտիվ գործարարության առումով, մեծ աշխուժություն չի կարող գրանցվել, լեռնաարդյունաբերության, գյուղատնտեսության ոլորտներում աշխատանքները սեզոնային են»,- այս մասին Panorama.am-ի հետ զրույցում, խոսելով այս տարվա հունվար ամսվա համար Ազգային վիճակագրական ծառայության հրապարակած ՀՀ սոցիալ-տնտեսական վիճակը բնութագրող ընթացիկ-օպերատիվ ամփոփմամբ ստացված նախնական հիմնական մակրոտնտեսական ցուցանիշների մասին, կարծիք հայտնեց «Այլընտրանք» հետազոտական կենտրոնի դեկավար, տնտեսական գիտությունների դոկտոր Թաթուլ Մանասերյանը:

Նրա խոսքով, հունվարին դեկտեմբերի համեմատ անկումը օրինաչափ է: «Բարեբախտաբար, 2011թ. Հայաստանում պսակվեց բավականին լուրջ հաջողություններով, բացառությամբ շինարարության ոլորտի, որտեղ մենք կանախտեսում էինք, որ անկումը շարունակվելու է»,-ասաց Մանասերյանը, հիշեցնելով, որ 2011-ին ՀՆԱ-ի աճը գերազանցեց նախատեսվող ցուցանիշը` 4.6 տոկոսի փոխարեն կազմելով 5.9 տոկոս:

Նա անդրադարձավ նաև  նախկին վարչապետ, տնտեսագետ Հրանտ Բագրատյանի արած հայտարարությանն ու նշեց. «Չի կարելի ասել, որ անցել ենք կայուն զարգացման փուլ, ոչ էլ կարելի է ասել, որ Հայաստանի տնտեսությունը անկման միտում ունի»:

Նշեց նաև, որ նման հայտարարությունները չարախնդալու միտում ունեն, իսկ Հայաստանի տնտեսությունն ունի բավարար կարողություն` այս տարի երկնիշ տնտեսական աճ ունենալու գյուղատնտեսության, ՏՏ, ծառայությունների ոլորտներում:

Նրա խոսքով, Բագրատյանի վարչապետության օրոք արված գործողություններին, երբ Հայաստանի տնտեսությանը հասցվեց մեծագույն վնաս, պետք է նրան հաջորդող վարչապետները տնտեսական, իսկ նախագահները քաղաքական գնահատականներ տային:

«Երբ փորձում է քննադատել վիճակագիրներին, կարծում եմ, դրա բարոյական իրավունքը պետք է ձեռք բերել, քանի որ նրա վարչապետության օրոք ամենախոր անկումը ապրեց Հայաստանի տնտեսությունը: Չեմ ուզում կոպիտ հնչի, բայց դրանց հաջորդած իշխանությունները ուղղակի պարտավոր էին գնահատականներ տալ, վարչապետները` մասնագիտական տնտեսական գնահատականներ, իսկ հաջորդ նախագահնները` քաղաքական: Ես հակված չեմ կարծելու, որ սա անաչառ գնահատական է, սա չարախնդալու նույն գործընթացի շարունակությունն է, ինչ մենք տեսել ենք վերջին տարիներին»,- ասաց տնտեսագետը, խորհուրդ տալով մտածել սեփական «վտանգների» մասին:

Թաթուլ Մանասերյանը հիշեցրեց, որ ՀՀ ազգային վիճակագրության ծառայության մեթոդաբանությունն այնպիսին է, որ, օրինակ, հունվար ամսվա ցուցանիշները համեմատում են թե նախորդող ամսվա` դեկտեմբերի, և թե նախորդ տարվա համապատասխան ժամանակահատվածի` հունվարի հետ: «Նրանց, ում ձեռնտու է ներկայացնել ավելի վատ վիճակ, օգտվում են առաջին ցուցանիշից»,- նկատեց Թաթուլ Մանասերյանը` ևս մեկ անգամ նշելով, որ գիտական տեսանկյունից դա տեղին չէ, քանի որ գործ ունենք սեզոնային ակտիվության գործոնի հետ:

Կապված այն կարծիքների հետ, թե Հայաստանում անհրաժեշտ է ֆինանսական տարին սկսել հոկտեմբերի 1-ից, Թաթուլ Մանասերյանն արձագանքեց. «Կան մարդիկ, որոնք ինչպես նախկինում, այնպես էլ այսօր փորձում են այստեղից կամ այնտեղից կարդացած, լսածները տեղայնացնել Հայաստանի օրինակով»: Նրա խոսքով, իսկապես կան երկրներ, որտեղ ֆինանսական տարին մեկնարկում է հոկտեմբերի 1-ին, սակայն դրա ազդեցությունը որևէ էական նշանակություն չունի. «Դրանից ոչ տնտեսության, ոչ էլ ՀՆԱ-ի կառուցվածքը չի փոխվելու»:

«Պետք է իրատես լինել, տեսնել, թե Հայաստանը ինչ ներուժ ունի, և իմանալ ինչ ակնկալիքներ մենք պետք է ունենանք: Այս պարագայում, իհարկե, չի կարող գոհացնող լինել ՀՆԱ-ի եղած կառուցվածքը, բայց նաև սուր գնահատականները, կարծում եմ, տեղին չեն»,-ասաց տնտեսագետը:

Նշենք, որ ՀՀ ԱՎԾ օրերս հրապարակված հաղորդագրության համաձայն` 2012-ի հունվարին տնտեսական ակտիվության ցուցանիշը 2011-ի նույն ժամանակահատվածի համեմատ աճել է 4.4 տոկոսով: Տվյալների համաձայն` մակրոտնտեսական բոլոր ցուցանիշները երկրում դրական միտում են ունեցել. արդյունաբերության ծավալները նախորդ տարվա հունվարի համեմատ աճել են 21.0, գյուղատնտեսությունը` 0.1, շինարարությունը` 0.5, առևտուրը` 0.1, ծառայությունները` 6.7 տոկոսով: Նույն ժամանակահատվածի հետ համեմատած 4.8 տոկոսով աճել են նաև սպառողական գները: