Ամենից շատ կարդացված նյութեր

13:50 14/03/2012

«Զվարթնոցի» հետ համաձայնությունից հետո «Արմավիան» հաղորդագրություն է տարածել

«Արմավիա» ավիաընկերության մամուլի ծառայությունից իրազեկել են, թե ընկերությունն այս տարվա ապրիլ ամսին մտադիր է ներմուծել նոր մեծ ինքնաթիռներ, այդ թվում այնպիսիք, որոնք ընկերության կողմից առաջին անգամ են շահագործվելու:

Հաղորդագրությունում նշվում է նաև, թե ընկերությունը պատրաստվում է ակտիվ ամառային շրջան անցկացնել՝ չվերթներ իրականացնելով տարբեր ուղղություններով, միաժամանակ պահպանելով ավանդական դարձած չվերթները դեպի Մերձավոր Արևելքի և Եվրոպական հանգստավայրեր:

Ավիաընկերությունից հայտնել են նաև, թե թռիչքների աշխարհագրության ընդլայնման համատեքստում ընկերությունը ծրագրում է նոր ուղղություններ բացել դեպի Միլան, Ստոկհոլմ և Բիրմինգեմ:

Հիշեցնենք, ավելի վաղ ավիաընկերության սեփականատեր Միխայիլ Բաղդասարովը պահանջել էր, որ «Զվարթնոց»-ը 25 տոկոսով իջեցնի սպասարկման գները, հակառակ պարագայում ինքը կհայտարարի ընկերության սնանկության մասին:

Երկու ընկերությունների ղեկավարների միջև երեկ կայացած բանակցությունների արդյունքում, ինչպես փոխանցել էին ՔԱԳՎ-ից, կողմերը փոխհամաձայնության եկել են:

Placeholder