Եթե Գյումրիում կատարվածը ընտրությունների հետ կապ ունենա, իրավական հստակ որակում կտրվի. Դատախազի տեղակալ

Եթե պարզվի, որ Գյումրիում կատարված խուլիգանությունը առնչություն ունի ընտրությունների հետ, ապա համապատասխան իրավական որակում կստանա: Այսօր այդ մասին դատախազությունում տեղի ունեցած քննարկման ժամանակ հայտարարեց Գլխավոր դատախազի տեղակալ Արամ Թամազյանը:

«Գյումրիում խուլիգանության փաստի առթիվ հարուցվել է քրեական գործ, կողմերը դեռևս չկան, հայտնաբերելու դեպքում, եթե պարզվի, որ դա առնչություն ունի ընտրությունների, համապատասխան որակումներ կստանա», -հայտարարեց Թամազյանը` ընդգծելով, որ մինչև արարքի շարժառիթը չբացահայտվի, իրավապահ մարմինները չեն կարող կատարվածին քրեաիրավական գնահատական տալ:

Panorama.am-ը տեղեկացրել էր, որ մարտի 30-ին ժամը 13:00-ի սահմաններում Գյումրու Արամ Սարգսյանի անվան մարզադպրոցում կատարված խուլիգանության փաստի առթիվ մարտի 31-ին քրեական գործ է հարուցվել ՀՀ Քր. Օր.-ի 258-րդ հոդվածի 3-րդ մասի 1-ին կետի հատկանիշներով` «խուլիգանություն, որը կատարվել է մի խումբ անձանց կամ կազմակերպված խմբի կողմից»:
Գլխավոր դատախազությունը տեղեկացրել էր, որ պարզվել է Գյումրիում մարտի 30-ին տեղի ունեցած միջադեպին մասնակցած որոշ մարդկանց ինքնությունը: Սակայն անուններ չեն հրապարակել` նշելով, որ ձեռնարկվում են միջոցառումներ մյուսներին հայտնաբերելու, ինչպես նաև մասնակից բոլոր անձանց ինքնությունը և արարքների դրդապատճառները պարզելու ուղղությամբ:

Մասնավորապես, վկայակոչելով ոստիկանությանը, նշել էինք, որ մարտի 30-ին քննչական գործողություններ են կատարվել, որի շրջանակներում դեպքի վայր զննության արդյունքում առգրավվել են արնանման հեղուկի հետքեր, վնասված գույք: Հարցաքննվել է նաև մարզադպրոցի աշխատակցուհին, դեպքի ականատեսները, Գյումրու Մսի կոմբինատի թաղամասի (այստեղ է գտնվում մարզադպրոցը-թղթ.) բնակիչները: Լրացուցիչ զննվել է նաև մարզադպրոցը, ինպես նաև Գյումրու Լիսինյան փողոցի թիվ 10 շենքի դիմացի տարածքը ու շենքի տակ գտնվող մթերային խանութը:

Վերջին օրերին մամուլն անդրադարձել էր Գյումրիում տեղի ունեցած այս միջադեպին և դա դիտարկել նախընտրական զարգացումների համատեքստում: Մասնավորապես, «Հրապարակ» թերթը գրել էր, որ բախում է տեղի ունեցել Գյումրու քաղաքապետ Վարդան Ղուկասյանի և թիվ 34 ընտրատարածքում մեծամասնականով «Բարգավաճ Հայաստան»-ի կողմից առաջադրված թեկնածու Մարտուն Գրիգորյանի կողմնակիցների միջև: