Մրցույթ` Բրյուսովի անվան համալսարանի ռեկտորի թափուր պաշտոնը զբաղեցնելու համար

Մինչ Վ. Բրյուսովի անվան պետական լեզվաբանական համալսարանի մի խումբ ուսանողներ ամենատարբեր միջոցներով` դասադուլ, բողոքի ցույց կառավարության շենքի մոտ, պայքարում են` պահանջելով «ետ վերադարձնել» իրենց ռեկտոր Սուրեն Զոլյանին, ՀՀ կրթության և գիտության նախարարությունը հայտարարում է բաց մրցույթ «Երևանի Վ. Բրյուսովի անվան պետական լեզվաբանական համալսարան» պետական ոչ առևտրային կազմակերպության ռեկտորի թափուր պաշտոնը զբաղեցնելու համար:

Հայտարարությունը տեղադրված է ԿԳՆ պաշտոնական կայքում: Մրցույթին մասնակցելու համար դիմումները պետք է ներկայացնել մայիսի 2-ից մինչև հունիսի 1-ը: Մրցույթը տեղի է ունենալու հունիսի 12-ին:

Հիշեցնենք, որ ԿԳ նախարար Արմեն Աշոտյանը երկու խիստ նկատողությունից հետո Բրյուսովի անվան լեզվաբանական համալսարանի ռեկտոր Սուրեն Զոլյանի աշխատանքային պայմանագիրը լուծված համարեց: Զոլյանը նկատողություններն ու ազատման հրամանը համարում է հակաօրինական, բուհի ուսանողները արդեն մի քանի օր է, պահանջում են ռեկտորի պաշտոնում վերադարձնել Զոլյանին: Նշենք, որ ԿԳՆ որոշմամբ, ռեկտորի պաշտոնակատար է նշանակվել Գայանե Գասպարյանը:

Նախորդող նորություններ` Բրյուսովում ներկայացրել են ռեկտորի պաշտոնակատարին
Բրյուսովի գիտխորհրդի արտահերթ նիստը չի կայացել
Արմեն Աշոտյանի պարզաբանումներն այնքան էլ չգոհացրեցին բրյուսովցիներին