ԱՄՆ նախագահի աշխատակազմում քննարկվում է Իրանի նկատմամբ լուրջ զիջումներ կատարելու հարցը

ԱՄՆ նախագահի աշխատակազմում քննարկվում է Իրանի նկատմամբ լուրջ զիջումներ կատարելու հարցը:
Այդ մասին նշված է ամերիկյան «The Los Angeles Times» պարբերականում թողարկված վերլուծական հոդվածում:

Տեղեկատվության մեջ նշվում է, որ հնարավոր է, որ ԱՄՆ վարչակազմը համաձայնվի, որպեսզի Իրանն ուրանի հարստացման աշխատանքներն հասցնի մինչև 5 տոկոսի, փոխարենը՝ Վաշինգտոնը Թեհրանից կպահանջի, որպեսզի վերջինս թույլատրի միջազգային տեսուչներին մուտքն Իրանի միջուկային հաստատություններ:

Հոդվածի հեղինակի դիտարկմամբ՝ Վաշինգտոնը եկել է այն համոզման, որ Իրանի նկատմամբ կիրառված կոշտ քաղաքականությունն անարդյունավետ է, և եթե ԱՄՆ-ն և նրա դաշնակիցները շարունակեն ճնշումներ կիրառելու քաղաքականությունը, ապա առկա գործընթացները կմտնեն փակուղի:

«Բարաք Օբամայի վարչակարգի նման նախաձեռնությունը նախագահական ընտրությունների նախաշեմին հանրապետականները կարող են շահարկել և օգտագործել վերջինիս դեմ»,-նշված է հոդվածում:

Հավելենք, որ ապրիլի 14-ին Իրանի միջուկային խնդրի առնչությամբ Ստամբուլում կայացավ Իրանի և 5+1 խմբի (ՄԱԿ-ի ԱԽ 5 մշտական անդամներ և Գերմանիա) հանդիպման առաջին փուլը: Երկրորդ փուլը կկայանա մայիսի 23-ին՝ Բաղդադում: