Ամեն ինչ անելու եմ փողոցում լինելու համար, դուք դա կտեսնեք. Արամ Զավենիչի ճեպազրույցը (տեսանյութ)

«Թե ես, թե կուսակցությունը մտնում ենք շատ կարևոր, լուրջ շրջան, երբ որոշումները չափից ավելի կարևոր են և ձեր ներողամտությունն եմ հայցում այս շրջանում խնդիրների լուծման համար որոշակի ժամանակ ուզելու առումով: Կուսակցության քննարկումներից հետո, առաջիկա մեկ շաբաթվա ընթացքում հասանելի կլինեմ և կպատասխանեմ ձեր բոլորի հարցերին», -այսօր ճեպազրույցի ընթացքում հայտարարության ընթերցումից հետո ասաց «Հանրապետություն» կուսակցության առաջնորդ Արամ Զավենի Սարգսյանը և ասաց, որ չի պատասխանի որևէ հարցի:

Այնուամենայնիվ, լրագրողները համառեցին, և նա մի քանի հարցի պատասխանեց:

-Համագումարը ե՞րբ է լինելու

-Այդ հարցը կորոշի կուսակցության քաղաքական ակտիվը: Նախնական տվյալներով, ասեմ, որ դա կլինի սեպտեմբերի վերջին: Մինչև այդ ասեմ, որ մենք հակված ենք շփվել քաղաքացիական հասարակության անդամների հետ: Ես համոզված եմ, որ այս երկրի բնակչության իննսուն տոկոսը և ավելին փոփոխություն է ուզում: Պատահական չեմ համարում, որ նույն իշխանությունը փոփոխություն բառն օգտագործեց ու դրանով քվեներ հավաքեց: Ես հակված եմ փոփոխություն ուզող մարդկանց տեսակետները հաշվի առնել, իրենց մոտեցումների հետ կապված քննարկումներ անցկացնել և այդ մարդկանց համախմբել: Ես տեսնում եմ, որ ժողովուրդն այդ պոտենցիալն ունի և այդ առումով լուրջ աշխատանք է պետք իրականացնել:

-Ակնհայտ է, որ դուք նոր քաղաքական ուժ ձևավորելու ճանապարհին եք, բացառո՞ւմ եք, որ իշխանական որոշ կուսակցությունների հետ կհամագործակցեք:

-Ես չեմ բացառում քաղաքական դաշտում քաղաքական ուժերի, անհատների հասարակական կազմակերպությունների հետ համագործակցությունը: Սա մեր երկիրն է, և մեր երկրում բոլորը բացառությամբ նրանցից, ովքեր այս ժողովրդի առաջ ազնիվ չեն եղել, ովքեր սեփական շահը գերադասել են հասարակական շահից և ովքեր միանշանակ ընկալում չունեն և այսօրվա իրավիճակի համար պատասխանատու են, բացառությամբ այդ ուժերի, համագործակցությունը համարում եմ շատ հնարավոր:

-ՀԱԿ-ի հետ տարաձայնությունները երբվանի՞ց են ի հայտ եկել:

-Անցած տարի գարնանից են ի հայտ եկել: Դուք բոլորդ հիշում եք այդ ժամանակահատվածը:
Իսկ ե՞րբ հայտնի կդառնա ՀԱԿ-ից դուրս գալու կամ չգալու մասին վերջնական պատասխանը
Ամենայն հավանականությամբ, եկող երկուշաբթի-երեքշաբթի կուսակցությունը հայտարարությամբ հանդես կգա:

-Պրն, Սարգսյան, տեղեկություն ունե՞ք ՀԱԿ-ում շատ են ձեր տեսակետը կիսողները

-Հարցումներ չենք արել, չգիտեմ

-ՀԱԿ-ից աղմուկով եք դուրս գալիս, ի՞նչ եք սպասում առաջիկայում

-Բացարձակապես աղմուկով դուրս չենք գալիս, դեռ հայտնի չէ, դուրս ենք գալիս, թե՞ ոչ: Չենք բացառում, որ դուրս կգանք, որովհետև տարաձայնություններ ունենք և դրանք ես, իսկապես, բարձրաձայնել եմ: Մենք մնացել ենք Հայ ազգային կոնգրեսում մի պարզ պատճառով, որ հայ ժողովուրդը ընդդիմադիր դաշտի համախմբվածությունը կարևորել է: Եվ այդ համախմբվածությունը և առաջիկայում Ազգային ժողովի ընտրություններին չխոչընդոտելու, ձայները չպակասեցնելու համար մենք մեր ներդրումն ենք ունեցել այդ գործում: Այսօր այդ գործընթացը վերջացել է, և մենք ազատ ենք մեր տեսակետներն ասելու: Կուզենայի ավելացնել նաև, որ Ազգային ժողովի մանդատը վայր դնելու որոշումս զուտ քաղաքական է և քաղաքական նկատառումներից ելնելով եմ դա անում: Ցավով եմ խոստովանում, որ ՀՀ ազգային ժողովը այդպես էլ չդարձավ քաղաքական մարմին, որը զբաղվեր լուրջ օրենսդրական գործունեությամբ: Այդ ազգային ժողովը դակիչ մարմին է դարձել նախագահ-կառավարություն շրջանակում և իջեցված հրահանգները նման մեծամասնության պարագայում այլ ելք չունի, քան դակելը: Բոլոր այն մարդկանց, ովքեր ազնվորեն գնում են Ազգային ժողով, հույս ունենալով, որ իրենցից բան է կախված և կարող են բան փոխել, հաջողություն եմ մաղթում, և իմ ներկայությամբ չեմ ուզում կաշկանդել, իմ իրատեսական, պրագմատիկ մոտեցումներով կասկածի տակ դնել իրենց աշխատելու ցանկությունը: Ես կարծում եմ, որ այդ օրենքների մասին իմ տեսակետը կարող եմ ասել ոչ միայն Ազգային ժողովում, այլ հասարակությանը լրատվամիջոցներով և հանրահավաքներով: Համոզված եմ, որ այս ժողովրդի իննսուն և ավելի տոկոսը ընդդիմություն լինելով, Ազգային ժողովում ներկայացված է 15-20 տոկոսը, ոչ ավելին: Ես գերադասում եմ այդ 90 տոկոսի հետ լինելու փողոցում և ամեն ինչ անելու եմ փողոցում լինելու համար, դուք դա կտեսնեք:

-Իսկ նախագահական ընտրություններում առաջադրելո՞ւ եք Ձեր թեկնածությունը:

-Առաջիկայում այդ հարցերին կպատասխանենք:

Նա նաև հայտարարեց, որ ՀԱԿ-ին չի առաջարկել հրաժարվել մանդատներից և այդ մասին լուրերը իրականությանը չեն համապատասխանում: «Ես իմ մանդատը վայր չեմ դնում որևէ մեկին Ազգային ժողով մտցնելու համար: Իմ համար էական չի, թե հաջորդ մարդն ով է, ով ուզում է մտնի, իմ որոշումը քաղաքական է և դա կախված է ՀՀ Ազգային ժողովի նկատմամբ իմ վերաբերմունքից», -հավելեց Արամ Զավենիչը: