Վճռական ենք, որ առաջին գծում իշխողի դերակատարությունը երբեք չզիջենք հակառակորդին. ԼՂՀ ՊԲ հրամանատար

Այս տարվա առաջին կիսամյակում ադրբեջանական կողմից հնչող կրակոցների քանակը, նախորդ տարվա նույն ժամանակահատվածի համեմատ, ավելացել է երկու անգամ, իսկ դիվերսիոն հետախուզական խմբերի գործողությունների քանակը` չորս անգամ: Անցած տարվա առաջին կեսին հակառակորդի կողմից երկու դիվերսիոն գործողություն է կատարվել, իսկ այս տարի արդեն չորս նման գործողություն է կատարվել: Դրանցից երկուսի դեպքում երեք զինծառայող վիրավորվել է, իսկ մեկը մահացել: Իսկ մյուսների դեպքում ժամանակին բացահայտվել է, և հակառակորդի խումբը կորուստներ կրելով, հեռացել է:

Այս և նախկին տարիների վիճակագրական տվյալները հիմք են տվել Լեռնային Ղարաբաղի պաշտպանության նախարար, պաշտպանության բանակի հրամանատար, գեներալ-լեյտենանտ Մովսես Հակոբյանին կարծել, որ վերջին տարիներին ղարաբաղա-ադրբեջանական սահմանում իրավիճակը փոխվել է, և հակառակորդը տարեց տարի առաջնագծում լարվածությունը մեծացնում է:

Դրա պատճառները, ըստ նախարարի, մի քանիսն են` նախ այն, որ Ադրբեջանն այդպիսով փորձում է միջազգային հանրությանը ցույց տալ, որ Լեռնային Ղարաբաղի հիմնախնդիրը չի լուծվում ԵԱՀԿ Մինսկի խմբի շրջանակներում և պատերազմն անխուսափելի է, մյուս կողմից փորձում է զորքը վարժեցնել, բարձրացնել մարտական ոգին, և վերջապես, լարվածությունը մեծացնելով, ադրբեջանական կողմը ամեն գնով ուզում է հարված հասցնի հայկական զինված ուժերին, որպեսզի մերոնք կորուստներ ունենան:
Մովսես Հակոբյանի խոսքով, երկար տարիների ընթացքում արցախյան բանակը կարողացել է իրագործել իր առջև դրված խնդիրը և տարածաշրջանում զսպողի համբավ է վայելում: «Խաղաղությունը տարածաշրջանում պաշտպանության բանակի ուժի շնորհիվ է, որ պահպանվում է: Մենք վճռական ենք, որպեսզի առաջին գծում իշխողի դերակատարությունը երբեք չզիջենք հակառակորդին: Եթե հակառակորդը հանկարծ մի պահ հասկացավ, որ ինքն իշխող է առաջնագծում, պատերազմ կլինի»,- հայտարարեց պաշտպանության բանակի հրամանատարը:

Պատերազմի հնարավոր վերսկսման մասին խոսելիս, գեներալ-լեյտենանտն ասաց, որ դա միշտ էլ հնարավոր է: «Այսօր էլ, այս պահին էլ Ադրբեջանը հնարավոր է վերսկսի պատերազմ: Բայց այդ դեպքում մենք նորից հաղթելու ենք: Եվ հաղթելու ենք, լինելով ավելի լավ իրավիճակում, քան այսօր կա: Բայց բոլոր դեպքերում, կարծում եմ ամենալավ ալտերնատիվը խաղաղությունն է, և մեր իշխանություններն ամեն ինչ անում են, որպեսզի պատերազմը չվերսկսի: Ու այս պահին և մոտակա ժամանակներում կարծում եմ, պատերազմի վերսկսումը հանարվոր չէ»,- նկատեց Մովսես Հակոբյանը:

Հարցին, թե բավարարո՞ւմ է արդյոք միջազգային կառույցների աշխատանքը հաշվի առնելով այն, որ ադրբեջանական կողմից հրադադարի ցանկացած խախտման ու նաև զոհերի դեպքում հնչում են ընդհանուր բնույթի հայտարարություններ, Հակոբյանն ի պատասխան նկատեց, որ այդ կառույցների աշխատանքը իրեն և բավարարում է, և չի բավարարում: Ղարաբաղյան հակամարտության լուծման շրջանակներում միջազգային կառույցների գործունեությունը ԼՂՀ պաշտպանության բանակի հրամանատարին գոհացնում է այնքանով, որ տարածաշրջանում նաև նրանց աշխատանքով պայմանավորված, խաղաղություն է տիրում:

«Նրանց գործունեությունը, սակայն, չի բավարարում այն առումով, որ հակառակորդի կողմից հրադադարի ռեժիմի խախտումներից ու ոտնձգություններից հետո իրենք ընդհանուր հայտարարություններ են անում: Իհարկե, դա ինձ չի բավարարում, և այդ պահին ես ուզում եմ կոնկրետ պատասխան նրանցից: Բայց պետք է նկատել, որ իրենք մեզ էլ են մեղավոր ճանաչելու, որովհետև հակառակորդի ամեն մի սադրանքին, մենք պատասխանում ենք շատ խիստ և մի քանի անգամ ավելի զոհերով», -հավելեց ՊԲ հրամանատարը: