Գագիկ Ծառուկյանը սնանկացնում է իր սանիկին

«Հայկական ժամանակը» գրում է, որ այսօր առավոտից ԲՀԿ նախագահ Գագիկ Ծառուկյանի սանիկ Արթուր Հարությունյանին՝ Պալաչին պատկանող «Քինգ դե լյուքս» ընկերության վարորդները անժամկետ գործադուլ են սկսելու, որն, ըստ էության, ուղղված է Ծառուկյանի դեմ: Թերթը նշում է, որ գործադուլը տեղի է ունենալու Աբովյան ու Չարենցավան քաղաքներում, և հիշեցնում, որ խնդիրը վերաբերում է Գագիկ Ծառուկյանի կողմից ապօրինաբար «բարեգործական երթուղիներ» շահագործելուն՝ նույն այն ուղղություններով (թիվ 289 և 275 երթուղիներ), որոնք շահագործում է «Քինգ դե լյուքս» ընկերությունը, երթուղի են մտցվում ուղևորներին անվճար սպասարկող ՊԱԶ ավտոբուսներ: Թերթը նկատում է. «ԲՀԿ նախագահ Գագիկ Ծառուկյանը հետևողականորեն շարունակում է սնանկացնել իր սանիկ Արթուր Հարությունյանին (Պալաչ), որն իր բիզնեսը փրկելու նպատակով անդամագրվել էր ՀՀԿ-ին: ՀՀԿ-ն, սակայն, ինչպես պնդում են Պալաչի ընկերները, «քցում է» Արթուր Հարությունյանին: …Հարությունյանի ընկերներն ասում էին, որ եթե խնդիրը լուծում չստանա, Հարությունյանը կլքի ՀՀԿ-ն և հնարավոր է՝ հեռանա երկրից, և այս ամենից մեծ աղմուկ բարձրանա, ինչը շատ վատ կանդրադառնա երկրի վարկանիշի վրա»: