Հ. Դարբինյան. Այս պահին վիրահատական որևէ միջամտություն չի կարելի անել

Դիանա Սիրունյանի վիճակի վերաբերյալ հրավիրած կոնսիլիումը երկու ժամ է տևել: Ինչպես հաղորդել էինք, դրան մասնակցում էին հանրապետության լավագույն մասնագետները, ինչպես նաև` փարիզաբանակ հայտնի ռեանիմատոլոգը:

«Աղջկա վիճակը մի քիչ ավելի ծանր է, քան կար: Միացված է արհեստական շնչառություն, առկա է խորը կոմատոզ: Մտածում ենք, որ կոտրվածքներից ճարպային էմբոլիա է գնացել ուղեղ: Դեմքի ոսկորներն են փշրված, կոնքի ոսկորները: Ներկա պահին վիրահատական որևէ միջամտություն չի կարելի անել»,- հիվանդի վիճակը ներկայացրեց առողջապահության նախարարի առաջին տեղակալ Հայկ Դարբինյանը:

Նրա խոսքերով` վաղվանից կսկսեն իրականացնել կոտրված դիմային ոսկորների ֆիքսացիա:

«Գնալով հույսը պակասում է, բայց տա Աստված երեխան դուրս գա այդ վիճակից»,- նշեց փոխնախարարը:

Հիշեցնենք, որ օգոստոսի 18-ին հոր` Սուրեն Սիրունյանի մահից հետո Դիանան 5-րդ հարկից իրեն ցած է նետել: Այժմ նա գտնվում է Հանրապետական հիվանդանոցի վերակենդանացման բաժանմունքում:

1971 թ. ծնված Սուրեն Սիրունյանը, ով Վանո Սիրադեղյանի թիկնազորի նախկին պետն է, մահացել է սրտի անբավարարությունից: Նրա հոգեհանգիստն այսօր է` Սուրբ Հովհաննես եկեղեցում: