ԱԱԾ. Սիրիայից եկած քաղաքացիները վերադարձել են Թուրքիա

«Զվարթնոց» օդանավակայանում Հայաստան մուտք գործելու թույլտվություն չստացած ընտանիքը վերադարձել է Թուրքիա:

ԱԱԾ մամուլի կենտրոնի պետ Արծվին Բաղրամյանը մեկնաբանելով ընտանիքի հետ կատարվածը, «Արմենպրես»-ին ասել է, որ հիշյալ անձինք իրականում ազգությամբ ասորի են և փորձել էին հատել ՀՀ պետական սահմանն առանց սահմանված փաստաթղթերի ու պատշաճ թույլտվության:

«Նրանք նպատակ էին հետապնդել, ՀՀ տարածքն օգտագործելով որպես տարանցիկ գոտի, ապօրինի միգրացիայի կազմակերպչի օժանդակությամբ տեղափոխվել երրորդ երկիր: Մինչ Հայաստան ժամանելը նրանց փորձը Ստամբուլից մեկնել Եվրոպա հաջողությամբ չի պսակվել: Սիրիայի նշված քաղաքացիները Երևան-Ստամբուլ չվերթով հետ են վերադարձվել ժամանման երկիր` Թուրքիա»,-ասել է Բաղրամյանը:

Հիշեցնենք, որ երեկ ոստիկանությունը հայտարարել էր, որ Հայաստանի Հանրապետություն ժամանած Սիրիայի 9 քաղաքացիներ չեն ներկայացրել ազգությամբ հայ լինելու հանգամանքը հիմնավորող որևէ փաստաթուղթ:

Հարակից նյութեր`

Ոստիկանություն. Սիրիայի 9 քաղաքացիներ չեն ներկայացրել ազգությամբ հայ լինելու հանգամանքը հիմնավորող որևէ փաստաթուղթ

Քանի՞ գրոշ արժե հրավերքդ, տիկի՛ն Հրանուշ. Սիրիահայ ընտանիքին արտաքսում է սպառնում