Սերժ Սարգսյանն ու Բակո Սահակյանը Արցախում մասնակցել են հիմնական դպրոցի բացման հանդիսավոր արարողությանը

Արցախի Հանրապետության Նախագահ Բակո Սահակյանը Հայաստանի Հանրապետության Նախագահ Սերժ Սարգսյանի հետ միասին սեպտեմբերի 8-ին Շուշի քաղաքում մասնակցել է Խաչատուր Աբովյանի անվան ԼՂՀ կառավարության և «Հայաստան» համահայկական հիմնադրամի համաֆինանսավորմամբ կապիտալ վերանորոգված հիմնական դպրոցի բացման հանդիսավոր արարողությանը: Այս մասին հայտնում են Արցախի Հանրապետության նախագահի աշխատակազմի տեղեկատվության գլխավոր վարչությունից:

Նախագահ Սահակյանը կրթությունը համարել է մեր պետության ռազմավարական կարևորություն ունեցող ճյուղերից մեկը, որը մշտապես գտնվում է իշխանությունների հատուկ ուշադրության կենտրոնում՝ հավելելով, որ նման կրթական հաստատության առկայությունը Շուշիում մեծապես կնպաստի նաև քաղաքի կայուն զարգացման գործընթացին:

Այնուհետև երկու հայկական հանրապետությունների ղեկավարներն այցելել են Շուշիի մի շարք շինարարական օբյեկտներ և տեղում ծանոթացել իրականացվող աշխատանքներին:

Միջոցառումներին ներկա էին վարչապետ Արա Հարությունյանը, Հայաստանի Հանրապետության Ազգային անվտանգության խորհրդի քարտուղար Արթուր Բաղդասարյանը, «Հայաստան» համահայկական հիմնադրամի գործադիր տնօրեն Արա Վարդանյանը, պաշտոնատար այլ անձինք: