Ամենից շատ կարդացված նյութեր

20:00 03/10/2012

Կառավարությունը ներկա փուլում աննպատակահարմար է համարում ԼՂՀ-ն ճանաչելու մասին օրինագծի քննարկումը

«Հայաստանի Հանրապետության կառավարությունը ներկա փուլում աննպատակահարմար է համարում ներկայացված օրենքի նախագծի քննարկումն ու ընդունումը»:

Սա ԱԺ նախագահ Հովիկ Աբրահամյանին ներկայացվելիք եզրակացության նախագծից հատված է, որը պատրաստել է կառավարությունը «Ժառանգություն» խմբակցության անդամ Զարուհի Փոստանջյանի կողմից շրջանառության մեջ դրած «Լեռնային Ղարաբաղի Հանրապետությունը ճանաչելու մասի» օրինագծի վերաբերյալ:

Նախագծի քննարկումը ընդգրկված է կառավարության վաղվա նիստի օրակարգում: Եզրակացության նախագիծը տեղադրված է կառավարության պաշտոնական էջում:

Հիշեցնենք, որ մոտ մեկ ամիս առաջ` սեպտեմբերի 4-ին ՀՀ ԱԺ «Ժառանգություն» խմբակցության քարտուղար Զարուհի Փոստանջյանը Ազգային Ժողովում շրջանառության մեջ է դրել «Լեռնային Ղարաբաղի Հանրապետությունը ճանաչելու մասին» Հայաստանի Հանրապետության օրենքի նախագիծը:

Խմբակցության մամուլի ծառայությունից պարզաբանել էին, որ օրենքի ընդունմամբ Հայաստանի Հանրապետության կողմից իրավամբ կճանաչվի Արցախի փաստացի կարգավիճակը` ելնելով այն հանգամանքից, որ Արցախի Հանրապետությունը լիարժեքորեն բավարարում է ինքնիշխան պետության համար սահմանված միջազգային օրենքի բոլոր նախապայմանները:

Placeholder