Շարունակվում է Երևանյան փառատոնը. Այսօր` Սերգեյ Ռախմանինով և Ֆելիքս Մենդելսոն

Հայաստանի պետական ֆիլհարմոնիկ նվագախումբը Երևանյան 6-րդ միջազգային երաժշտական փառատոնի շրջանակներում այսօր անդրադառնում է կոմպոզիտորներ Սերգեյ Ռախմանինովին և Ֆելիքս Մենդելսոնին: Արամ Խաչատրյան համերգասրահում կայանալիք համերգային ծրագրում հնչելու է Ռախմանինովի Դաշնամուրի կոնցերտ թիվ 2, Մենդելսոնի Սիմֆոնիա թիվ 4 «Իտալական» ստեղծագործությունները: Մենակատարն է մակեդոնացի դաշնակահար Սիմոն Տռփչեսկին, դիրիժորը` Էդուարդ Թոփչյանը:

Հիշեցնենք, որ փառատոնը մեկնարկել է սեպտեմբերի 10-ին ու կշարունակվի մինչև հոկտեմբերի 20-ը, կազմակերպիչն է Հայաստանի պետական ֆիլհարմոնիկ նվագախումբը: Փառատոնի գեղարվեստական ղեկավարներն են Էդուարդ Թոփչյանը և Ալեքսանդր Չաուշյանը:

Երևանյան 6-րդ միջազգային երաժշտական փառատոնն անցկացվում է ՀՀ մշակույթի նախարարության աջակցությամբ, ՀՀ նախագահի տիկնոջ` Ռիտա Սարգսյանի բարձր հովանու ներքո:

Առաջիկայում փառատոնի շրջանակներում ծրագրված է ևս երեք համերգ: Ամփոփիչ համերգը կայանալու է հոկեմբերի 20-ին ու նվիրված է լինելու Միշել լեգրանի 80-ամյակին:

Նախորդող նորություն` Մեկնարկում է Երևանյան 6-րդ միջազգային երաժշտական փառատոնը