Sondakika. Անիի ավերակների տարածքը շարունակում է մնալ արոտավայր

Թուրքական «Սոնդաքիքա»(Sondakika) լրատվական կայքն անդրադարձել է Անիի ավերակների տարածքը` թուրք գյուղացիների կողմից որպես արոտավայր օգտագործվելու փաստին:

Կայքը նշում է, որ այդ տարածքում աշխատող անվտանգության 4 աշխատակիցները հավուր պատշաճի չեն կատարում իրենց պարտականությունները, և գյուղացիները խոշոր եղջերավոր անասուններին արածացնելու համար առանց որևէ արգելքի մտնում են հայկական հնագույն մայրաքաղաքի տարածք:

Ըստ աղբյուրի` մշակույթի և զբոսաշրջության նահանագային վարչության պետ Հաքան Դողանայը ժամանակ առ ժամանակ հանդիպում է Անիին հարակից Օջաքլը գյուղի բնակիչների հետ և բացատրում Անիի ավերակների պատմամշակութային կարևորությունը` շրջանի տնտեսական զարգացման հարցում:

Հաքան Դողանայը պահանջում է գյուղացիներից խնամքով վերաբերվել հնագույն հուշարձաններին և կենդանիներին չարածացնել այդ տարածքում, քանի որ Անիի ավերակների շնորհիվ շրջանի, մասնավորապես Օջաքլը գյուղի զբոսաշրջությունը կարող է զարգանալ: