Ռ.Թոփչյան. «Շարժել ենք որակի ապահովման հետ կապված մտահոգության անիվը»

Երևանի Մ. Հերացու անվան պետական բժշկական համալսարանում այսօր մեկնարկեց «Որակի ապահովումը ՀՀ մասնագիտական կրթության համակարգում» խորագրով շահակիցների երկրորդ համաժողովը: Այն կազմակերպվել է «Մասնագիտական կրթության որակի ապահովման ազգային կենտրոն» հիմնադրամի (ՈԱԱԿ) նախաձեռնությամբ՝ Կրթության և գիտության նախարարության, Նիդեռլանդների և Ֆլանդրիայի հավատարմագրման գործակալության, Համաշխարհային Բանկի և Ծրագրերի իրականացման գրասենյակի մասնակցությամբ: Համաժողովն անցկացվում է «Կրթության որակի շաբաթ»-ի շրջանակներում:

Ինչպես համաժողովի բացմանը նշեց ՈԱԱԿ-ի տնօրեն Ռուբեն Թոփչյանը, համաժողովի հիմնական նպատակներից է` խթանել որակի ապահովման վերաբերյալ երկխոսությունը ՈԱԱԿ-ի շահակիցների շրջանում, տարածել տեղեկատվություն ՀՀ մասնագիտական կրթության ոլորտում որակի ներքին և արտաքին ապահովման վերաբերյալ, ինչպես նաև քննարկել ապագայի մարտահրավերները և բացահայտել ՀՀ-ում կրթության որակի ապահովման բարելավման նոր հնարավորությունները:

Նրա խոսքերով՝ 2010թ-ին կայացած առաջին համաժողովը տվել է իր դրական արդյունքները: Այսօր արդեն կան փորձնական հավատարմագրման գործընթացն անցած հաստատություններ, ինքնավերլուծությունը հանձնած հաստատություններ: Ըստ՝ Ռ.Թոփչյանի՝ մինչ 2013թ-ի վերջ փորձնական հավատարմագրում կանցնեն նաև հանրապետության բոլոր բուհերը: «Ինքնավերլուծությունը լուրջ գործընթաց է ու բուհին հնարավորություն է տալիս վերլուծել բացթողումները: Այսօր կարող եմ փաստել, որ շարժել ենք որակի ապահովման հետ կապված «մտահոգության անիվը»: Մենք տեր ենք կանգնում կրթության որակին, և հուսով եմ, որ լավ արդյունքներ կունենանք»,- ասաց Ռ.Թոփչյանը: Անդրադառնալով որակի ապահովման գործոններից` ՈԱԱԿ-ի տնօրենն ասաց, որ որակն ապահովում են ուսանողները, դասախոսները, բուհի վարչական անձնակազմը և գործատուները:

Նիդեռլանդների և Ֆլանդրայի հավատարմագրման գործակալության խորհրդի նախագահ Կառլ Դիտրիխը նշեց, որ որակի ապահովումը ակնկալում է ոչ միայն լավ կրթության ապահովում, այլ նաև լավ փորձագիտություն, որը կնպաստի տնտեսության զարգացմանը: Նրա խոսքերով՝ Հայաստանը 2005թ-ից միացել է Բոլոնիայի գործընթացին և միասնական եվրոպական բարձրագույն կրթության որակին համապատասխանելու ուղղությամբ կատարվել են հսկայական քայլեր:

Նրա խոսքերով՝ համալսարանները պատրաստ են բարձր որակի կրթություն մատակարարել, սակայն տարբեր երկրների համալսարաններ տարբեր նպատակներ են իրենց առջև դնում: «Այն քայլերը, որոնք կառավարություններն իրականացնում են Բոլոնիայի գործընթացը կատարելու համար կարևոր են, սակայն պետք է զգուշացնեմ՝ անիրատեսական սպասելիքներ չունենաք»,- ասաց Կառլ Դիտրիխը:

Նշենք, որ համաժողովին մասնակցում էին հանրապետության բարձրագույն ուսումնական հաստատությունների ղեկավարներ, որակի ապահովման փորձագետներ և մասնագիտական կրթության որակի ապահովման ոլորտի այլ շահակիցներ: Համաժողովի շրջանակներում փորձագետները ներկայացրեցին մասնագիտական կրթության որակի արտաքին ապահովման և հավատարմագրման գործընթացների հիմնախնդիրներն ու համաշխարհային միտումները՝ անդրադառնալով նաև ՀՀ կրթական համակարգում տեղի ունեցող արմատական փոփոխություններին:

«Կրթության որակի շաբաթ»-ի շրջանակներում նախատեսվում է նաև վերապատրաստումներ Որակի արտաքին ապահովման` հավատարմագրման, գործընթացներում ներգրավված փորձագետների, ինչպես նաև դասախոսական կազմի, վարչական աշխատակազմի և ուսանողների հետ: