Այսօր հոգեկան առողջության համաշխարհային օրն է. Դեպրեսիա ունի 350 մլն մարդ

Ամբողջ աշխարհում մոտ 450 միլիոն մարդ ունի հոգեկան այս կամ այն խանգարում: Առողջապահության համաշխարհային կազմակերպության հաշվարկներով 2020թ. հաշմանդամություն առաջացնող հիվանդությունների ցանկում դեպրեսիան լինելու է երկրորդ տեղում։ Նույն կազամակերպության 2008թ. տվյալների համաձայն 2030-ին այն կլինի ամենատարածված խանգարումը:

ԱՆ հրապարակած տվյալների համաձայն, այսօր ամբողջ աշխարհում դեպրեսիա ունի 350 միլիոն մարդ: Հոգեկան առողջության համաշխարհային հետազոտության շրջանակներում 17 երկրներում իրականացված հարցումները ցույց են տվել, որ 20 մարդուց 1-ը նշում է տարվա ընթացքում դեպրեսիվ էպիզոդի առկայություն:

Առողջապահության նախարարությունում պատահական չեն համարում, որ Հոգեկան առողջության համաշխարհային համադաշնության կողմից հռչակված այս տարվա կարգախոսն է «Դեպրեսիա. գլոբալ ճգնաժամ»:

Դեպրեսիան հաճախ հանդիպող հոգեկան խանգարում է, որն արտահայտվում է ընկճված տրամադրությամբ, հետաքրքրությունների կամ հաճույքի զգացողության կորստով, էներգիայի նվազմամբ, մեղքի զգացողությամբ կամ ցածր ինքնագնահատականով, քնի խանգարումներով և ուշադրության կենտրոնացման դժվարությամբ:

Հոգեկան խանգարումներ կարող են լինել ցանկացած մարդու մոտ` անկախ տարիքից, սեռից, սոցիալ-տնտեսական կարգավիճակից, հասարակությունում զբաղեցրած դիրքից: Այդ պատճառով կարևոր է տվյալ երևույթի վերաբերյալ հասարակության բոլոր շերտերի ճիշտ իրազեկվածությունը: Հենց այդ նպատակով 1992 թվականից Հոգեկան առողջության համաշխարհային համադաշնության նախաձեռնությամբ հոկտեմբերի 10-ը նշվում է որպես հոգեկան առողջության համաշխարհային օր, որի հիմնական նպատակն է հասարակության ուշադրությունը հրավիրել հոգեկան առողջության հիմնախնդիրների վրա: Որպեսզի խնդրի մասին մտածեն ոչ միայն խանգարումներ ունեցողներն ու նրանց ընտանիքի անդամները և բուժանձնակազմը, այլև հասարակության բոլոր շերտերը, այդ թվում` քաղաքականություն կերտողները: