Հարվածների ճշգրտությամբ Հայաստանի հավաքականը գերազանցեց Իտալիայի ընտրանուն (լուսանկարներ)

Աշխարհի 2014 թ. առաջնության ընտրական փուլի Իտալիա-Հայաստան հանդիպմանը մենք արդեն անդրադարձել ենք: Մեր ընտրանին գործեց նվիրվածությամբ, տեխնիկական պատրաստականությամբ նույնիսկ գերազանցում էր մրցակցին, սակայն դա բավարար չէր` Եվրոպայի փոխչեմպիոնին պարտության մատնելու համար: Հայ ֆուտբոլիստները Հենրիխ Մխիթարյանի գերազանց անցման ու հարվածի շնորհիվ նույնիսկ վերականգնեցին հաշվի հավասարակշռությունը, սակայն չկարողացան զարգացնել հաջողությունը: Հյուրերը մարտավարական պատրաստվածությամբ պարզապես մրցակից չունեն ողջ Եվրոպայում, ինչի շնորհիվ շատ արագ կրկին տիրեցին նախաձեռնությանը և ստիպեցին Հայաստանի հավաքականին` ավելի շատ մտածելու պաշտպանության մասին: 

Քանի որ Իտալիայի հավաքականի առջևի գծի ֆուտբոլիստները շատ արագաշարժ են, Վարդան Մինասյանի թիմը փորձում էր կիրառել արհեստական խաղից դուրս վիճակի մարտավարությունը, ինչը մի շարք դրվագներում մեր թիմին փրկեց հետագա բարդություններից: Բավական է հիշել, որ ընդամենը մի քանի րոպեի ընթացքում իտալացիները 6 անգամ հայտնվեցին խաղից դուրս վիճակում: Ցավոք, Հայաստանի հավաքականի զինանոցում մարտավարական այլ հակաքայլ չգտնվեց:

Ամփոփելով ընտրական փուլի մեկնարկային տուրում անցկացրած բոլոր հանդիպումները` պետք է նշենք, որ մեր ընտրանին տոնել է 1 հաղթանակ, կրել 2 պարտություն, խփել է 2 գոլ, բաց թողել 4-ը: Եթե համեմատենք Եվրոպայի 2012 թ. առաջնության ընտրական փուլի մեկնարկային 3 հանդիպման հետ, այս անգամ արդյունքները շատ ավելի ցածր են: Այն ժամանակ Հայաստանի գլխավոր թիմը տոնել էր 1 հաղթանակ, կրել 1 պարտություն և արձանագրել 1 ոչ-ոքի` խփելով 5 գոլ և բաց թողնելով 4 գնդակ:

 

	Հայաստան	Իտալիա
Գոլեր	1	3
Խաղից	1	2
Ստանդարտ իրավիճակից	0	1
Ստանդարտ իրավիճակի խաղարկումից	0	1
Ձախ ոտքով	1	0
Աջ ոտքով	0	1
Գլխի հարվածով	0	2
Հարվածներ դեպի դարպասը	10	18
Դարպասին	5	6
Դարպասաձողին	0	1
Շեղ	5	6
Բլոկ	0	5
Խաղից	9	12
Ստանդարտ իրավիճակից	1	5
Ստանդարտ իրավիճակի խաղարկումից	0	1
Տուգանային հրապարակից	5	11
Տուգանային հրապարակի մատույցներից	5	7
Հարվածների ճշգրտություն	50%	33%
Դարպասապահների հետ մղած հարվածներ	4	4
Հետ մղում	2	2
Որսում	2	2
Անկյունայիններ	11	3
Խաղից դուրս վիճակ	0	10
Զգուշացումներ	5	2
Փոխարինումներ	2	2