Թուրքիան մեղադրանքներ չի ներկայացնում Ռուսաստանին Սիրիա զինամթերք առաքելու համար

Թուրքիան չի պատրաստվում մեղադրանքներ առաջադրել Մոսկվայի նկատմամբ օրեր առաջ սիրիական ինքնաթիռից առգրավված բեռի համար: Այս մասին «The Hurriyet Daily News» պարբերականին հայտնել է անանուն թուրք դիվանագետը:

«Մենք սկզբից ևեթ հայտարարում էինք, թե Սիրիան փորձել է անօրինական ճանապարհով զինամթերք տեղափոխել: Այդ իսկ պատճառով մեր դժգոհությունն ուղղված է ոչ թե Մոսկվային, այլ Դամասկոսին», - ասել է թուրք պաշտոնյան:

Թուրքիայի արտգործնախարար Ահմեդ Դավութօղլուն, իր հերթին, «Անադոլու» գործակալության հետ զրույցում նշել է, թե բեռն առգրավվել էր բացառապես Սիրիայի կողմից ավիացիայի կանոնների խախտման պատճառով: Այսպիսով, արգելք էր դրվել ոչ այն պատճաով, որ Մոսկվայի և Դամասկոսի միջև գործարքն անօրինական է եղել, այլ Սիրիայի անօրինական գործողությոնների պատճառով, մասնավորապես քաղաքացիական ինքնաթիռով ռազմական նշանակության բեռ տեղափոխելու համար:

Հիշեցնենք, հոկտեմբերի 10-ի երեկոյան թուրքական F-16 կործանիչները ստիպել էին սիրիական ավիաընկերության А320 ինքնաթիռին վայրէջք կատարել Անկարայի օդանավակայանում: Օդանավակայնում ժամեր տևած խուզարկումից հետո թուրքական իշխանությունները թույլ էին տվել թռիչքը Դամասկոս, նախօորք արգելք դնելով որոշ բեռների վրա, որոնք ինչպես հետագայում պարզաբանել էր վարչապետ Էրդողանը, ռազմական ոլորտում կիրառվող տեխնիկա է եղել:

Մոսկվան, իր հերթին, բացատրություններ էր պահանջել թուրքական իշխանություններից «ՌԴ քաղաքացիների նկատմամբ ոչ կոռեկտ վարվելակերպի համար»: ՌԴ ԱԳ նախարար Սերգեյ Լավրովն հայտարարել էր, թե ինքնաթիռով տեղափոխվող բեռն օրինական է եղել: