Իրանական կայք. Էրդողանի կառավարությունը Սիրիայի հարցում դիվանագիտական պարտություն է կրել

Էրդողանի կառավարությունը Սիրիայի հարցում դիվանագիտական պարտություն է կրել:
Այդ մասին նշված է իրանական «իրդիփլոմասի.իռ» կայքում թողարկված վերլուծական հոդվածում:

Հոդվածի հեղինակը, անդրադառնալով Սիրիայի հարցում Անկարայի վարած արտաքին քաղաքականությանը, նշում է. «Թուրքիան Սաուդյան Արաբիայի և Քաթարի պնդումների ազդեցության տակ կարծում էր, որ Բաշար ալ-Ասադը մի քանի ամսվա ընթացքում պաշտոնանկ կլինի, սակայն այժմ տեսնում է, որ բոլոր այդ հաշվարկները սխալ են եղել. Ներկայում Թուրքիան ստիպված է այլ ելք որոնել փրկվելու այդ ճգնաժամից»:

Ըստ հոդվածի՝ վերջին շրջանում թուրք-սիրիական սահմանում տեղի ունեցած միջադեպերը, ինչպես նաև Թուրքիայում սիրիացի մեծաքանակ փախստականների ներկայությունը երկրի տնտեսությունը կանգնեցրել են դժվարին մարտահրավերների առաջ, որն էլ հարուցել է հասարակության դժգոհությունը:

Իրանական աղբյուրը, հղում անելով թուրքական «Հուրիեթ» պարբերականին, նշում է. «Վերջին շրջանում Սիրիայի հարցում Թուրքիայի դիրքորոշումը կտրուկ փոխվել է: Եթե նախկինում Անկարան բացառում էր Իրանի և Ռուսաստանի ներկայությամբ Սիրիայի հարցով որևէ բանակցություն (Թեհրանն ու Մոսկվան աջակցում են Ասադին), ապա Թուրքիայի վարչապետ Ռեջեփ Թայիփ Էրդողանն օրերս Բաքվում կայացած «ԷԿՕ»-ի համաժողովի շրջանակներում ԻԻՀ նախագահ Մահմուդ Ահմադինեժադին առաջարկել է սիրիական խնդրի հանգուցալուծման առնչությամբ եռակողմ ձևաչափով կոմիտե ստեղծել, որի մեջ կարող են կամ Իրանը, Թուրքիան և Եգիպտոսը կամ Իրանը, Թուրքիան և Ռուսաստանն ընդգրկված լինել»:

Նախորդող տեղեկատվություն՝
Իրանական կայք. Թուրքիայի «զրո խնդիր հարևանների հետ» քաղաքականությունը հարյուրապատկել է լարվածությունը

ԻԻՀ հոգևոր առաջնորդի ներկայացուցիչ. Իրանը դատապարտում է Էրդողանի վարած սխալ քաղաքականությունը