Լատվիացի դիվանագետ. Պաշտոնական Ռիգան ևս քննադատեց Ադրբեջանի կողմից մարդասպանի ազատ արձակումն ու հերոսացումը

Լատվիան պատրաստ չէ Լեռնային Ղարաբաղի վերաբերյալ որևէ այլ որոշում կայացնել, պաշտոնական Ռիգան կիսում է այն տեսակետը, որը որդեգրել են Ղարաբաղյան հիմնահարցով զբաղվող միջազգային կառույցները:
Այս մասին Երևանում այսօրվա ասուլիսի ժամանակ հայտարարեց Լատվիայի արտգործնախարար Էդգար Ռինկևիչսը՝ պատասխանելով լրագրողի հարցին, թե արդյոք հնարավոր է, որ Լատվիան մի օր ևս ճանաչի Արցախի անկախությունը:

«Մենք կհարենք այն կառույցներին, որոնք զբաղվում են այդ հարցուվ: Ըստ իս՝ անկախության ճանաչումը չի նպաստի հիմնախնդրի հանգուցալուծմանը: Սա մի խնդիր է, որը պետք է քննարկվի: Մենք պետք է սևեռվենք բանակցությունների վրա, առ այն որոշման, որը կընդունվի Հայաստանի, Ադրբեջանի և համանախագահող երկրների կողմից: Չեմ կարծում, որ պետք է խոսել անկախության մասին՝ նախքան բանակցությւոնները հասնեն բոլոր կողմերի համար ընդունելի հանգրվանին»,- ասաց նա:

Լատվիացի դիվանագետը նաև շեշտեց, որ պաշտոնական Ռիգան ևս քննադատեց Ադրբեջանի կողմից մարդասպանի ազատ արձակումն ու հերոսացումը: «Մենք հանդես եկանք Վիլնյուսում այդ օրերին ընթացած սկանդինավյան և բալթիկ երկրների գագաթնաժողովին: Բացի այդ, համատեղ հայտարարություն հնչեց նաև Եվրամիության համապատասխան կառույցների կողմից: Կուզեի ասել, որ երբ բանը հասնում է արտաքին քաղաքական համագործակցությանը՝ սկանդինավյան և բալթյան երկրները խոսում են ութ ձայնով համատեղ», - ասաց նա և հավելեց, որ Ադրբեջանի նման քայլերը «չեն նպաստում երկխոսությանը այդ բարդ իրավիճակում»: «Մենք շատ լուրջ ենք ընդունել այդ փաստը», - շեշտեց նա: