Կ. Աճեմյան. Լավ կլիներ, որ ընդդիմությունն ուժերը վատներ, ոչ թե քննարկումների, այլ թեկնածուի հարցը լուծելու վրա

«Հայաստանի Հանրապետական կուսակցությունն այսօր  ամենակողմնորոշված քաղաքական ուժն է, որը հստակ գիտի, թե կոնկրետ, որ թեկնածուով է մասնակցում  նախագահական ընտրություններին, և ում օրակարգում նախագահական ընտրություններն են»,-այսօրվա ասուլիսի ժամանակ հայտարարեց ԱԺ ՀՀԿ խմբակցության պատգամավոր Կարինե Աճեմյանը:

Նրա խոսքով` ինչ վերաբերում է մյուս քաղաքական ուժերին, ապա դա «նրանց խնդիրն է և քաղաքական կողմնորոշման հարցը»:
«Լավ կլիներ, որ ընդդիմությունը ոչ թե ուժերը վատներ ինչ-որ քննարկումների վրա, այլ թեկնածուի հարցը լուծեր», - շեշտեց նա:

Ըստ բանախոսի` Հանրապետական կուսակցությունը ևս շահագրգռված է, որ ընդդիմությունը հանդես գա միասնական թեկնածուով, սակայն դրա մասին խոսելն այսօր դեռ շատ վաղ է:

«Ռեալ չեմ համարում միասնական թեկնածուի ի հայտ գալը, քանի որ դրա նախադրյալները չկան: Վերջնականապես թող կողմնորոշվեն թեկնածուի հարցում: Ընդդիմադիր ուժերը ամբիցիաներ ունեն, ուզում են ապացուցեն, որ իրենք են ավելի ընդդիմադիր: Բայց մենք պատրաստ ենք մրցակցել»,- ասաց նա և հավելեց. «Մենք ցանկանում ենք, որ վերջապես ուժեղ ընդդիմադիր թեկնածու լինի, որովհետև մեզ անընդմեջ մեղադրում են մենաշնորհի մեջ»:

Անդրադառնալով քաղաքական իրադարձություններին, մասնավորապես` նախընտրական փուլի նկատմամբ հասարակության արձագանքին, Կ. Աճեմյանը նշեց, որ ընտրությունները միշտ ավելի քաղաքական ուժերին են հետաքրքրում՝ գոնե այս փուլում: