Լևոն Զուրաբյան.«Քաղաքականության մեջ հավատարմության մասին խոսելը ծիծաղելի է»

 «Մեզ ոչ ոք ոչինչ խոսք չի տվել, հավատարմության երաշխիքներ չի տվել, քաղաքականության մեջ նման բաների մասին խոսելը ծիծաղելի է: Փորձում ենք անել այն, ինչ ժողովուրդը սպասում է. կստացվի դրան հասնել, ավելի լավ, չի ստացվի` մենք մեր ուժերով կանենք»,- այսօրվա ասուլիսի ժամանակ խոսելով «Բարգավաճ Հայաստան» կուսակցության հետ հարաբերությունների ներկա մակարդակի մասին` հայտարարեց Հայ ազգային կոնգրսի  համակարգող, ԱԺ պատգամավոր Լևոն Զուրաբյանը: Ըստ բանախոսի` ծավալվող համագործակցությունն ինչ-որ հույս է ներշնչում, բայց պետք չէ հավատալ ինչ-որ խոսքերի կամ քաղաքական ուժերին:

«Քաղաքականության մեջ առաջնորդվում են շահերով, և մենք տեսնում ենք, որ քաղաքական այս ուժը և էլի որոշ ուժեր ունեն այս ռեժիմից ազատվելու շահ»,- ասաց Լ. Զուրաբյանը:

Հարցին, թե որքանո՞վ է իրատեսական ԲՀԿ-ի ընդդիմադիր լինելը, Կոնգրեսի համակարգողն ասաց. «Նրանք ազատվում են առկա կաշկանդվածություններից, որոշ նշաններ էլ կան, որ չեն ազատվել, հիմա թե ինչ կլինի վերջում, երաշխիք չի կարող տալ ոչ մեկ»:

Ըստ Լ. Զուրաբյանի` եթե քաղաքական ուժերի համախմբման շանս կա, որի միջոցով հնարավոր է հասնել իշխանափոխության, ապա բոլոր հնարավոր տարբերակներով պետք է օգտագործել այդ շանսը:

Այն հարցին, թե արդյոք կսատարի՞ ՀԱԿ-ը «Բարգավաճ Հայաստանին» եթե վերջինս նախագահական ընտրություններին առաջարկի Գագիկ Ծառուկյանի թեկնածությունը որպես ընդդիմության միասնական թեկնածու, պատգամավորն ասաց. «Մենք նման հարց չենք քննարկել»:

Լրագրողները հիշեցրեցին Լ.Զուրաբյանին, որ ժամանակին Կոնգևեսի ներկայացուցիչները անվանում էին ԲՀԿ-ն «քրեաօլիգարխիկ» կառույց, և հարցրին, թե ինչ է փոխվել այսօր:  «ԲՀԿ-ն դուրս է եկել այս ռեժիմից: Նա քրեաօլիգարխիկ համակարգի մի մասն էր կազմում, և հիմա, հուսով ենք, փոխվել է», - ասաց նա` միաժամանակ նաև նշելով, որ Գագիկ Ծառուկյանին օլիգարխ անվանելն անհիմն է: