ԼՂՀ արտգործնախարար. Ադրբեջանը շահագրգիռ չէ տարածաշրջանի կայունության հարցում

Այսօր Երևանում մեկնարկեց «Տարածաշրջանային անվտանգության դինամիկան Հարավային Կովկասում» երկօրյա միջազգային համաժողովը, որին մասնակցում են շուրջ երկու տասնյակ փորձագետներ Հայաստանից, ԱՄՆ-ից, Ռուսաստանից, Մեծ Բրիտանիայից, Թուրքիայից, Իրանից, Իսրայելից:

Ինչպես բացման խոսքում նշեց ՀՀ պաշտպանության նախարարի խորհրդական, քաղաքական գիտությունների դոկտոր, գեներալ-մայոր Հայկ Քոթանջյանը՝ ամենամյա դարձած ներկայիս համաժողովի օրակարգում կքննարկվեն  Հայաստանի Հանրապետության և Արցախի անվտանգության համակարգին առնչվող հարցեր, տարածաշրջանային և գլոբալ այլ հիմնախնդիներ:

Համաժողովի բացմանն ընթերցվեց նաև ՀՀ նախագահ Սերժ Սարգսյանի և պաշտպանության նախարար Սեյրան Օհանյանի ուղերձները: Մասնակիցներին ողջունեց ԼՂՀ արտգործնախարար Կարեն Միրզոյանը: Նա ընգծեց, որ համաժողովը լավ առիթ է տարածաշրջանային անվտանգության վերաբերյալ մտքերի և գաղափարների փոխանակման համար:

«Մենք այսօր ականատես ենք Ադրբեջանի կողմից Լեռնային Ղարաբաղի Հանրապետության և Հայաստանի նկատմամբ անմիջական ռազմական սպառնալիքին, վարվող հայատյաց քաղաքականությանը: Այդ վարքագիծը ցույց է տալիս, որ Ադրբեջանը շահագրգիռ չէ տարածաշրջանի կայունության հարցում», - շեշտեց ԼՂՀ արտգործնախարարը: