Հայաստանի հավաքականը Դանիայից տուն է վերադարձել հաղթանակով

Դանիայում Հայաստանի հունահռոմեական ոճի ըմբշամարտի հավաքականը մասնակցել է «A» կարգի միջազգային մրցաշարի` մրցակցելով Հունգարիայի, Գերմանիայի, Ֆրանսիայի, Նորվեգիայի, Ֆինլանդիայի և տանտերերի հավաքականների հետ: 

Հայ ըմբիշները նվաճել են յոթ մեդալ և հաղթանակ են տոնել թիմային հաշվարկով: Առաջին տեղեր են գրավել Սասուն Ղամբարյանը, Արթուր Շահինյանը և Արթուր Ալեքսանյանը (Լոնդոնի օլիմպիական խաղերի բրոնզե մեդալակիր), երկրորդ տեղեր` Տիգրան Թորոսյանը ու Սարգիս Տոնոյանը, երրորդ տեղեր՝ Արամ Ջուլֆալակյանն ու Մաքսիմ Մանուկյանը: Այս մասին հայտնում է ՀՀ սպորտի և երիտասարդության հարցերի նախարարության տեղեկատվության և հասարակայնության հետ կապերի բաժինը:

Հավաքականի տղաներն արդեն փետրվարի 3-ից կմասնակցեն Երևանում անցկացվող ուսումնամարզական հավաքին, որին հրավիրված են 24 ըմբիշներ: