Ադրբեջանում մարդկանց ստիպում են «Like»-ել Իլհամ Ալիևի էջը ֆեյսբուքում

 Վերջերս Ադրբեջանի Տնտեսական զարգացման նախարարության մի աշխատակից դիմել էր «azadliq.org» գործակալությանը, հայտնելով, որ իրենց նախարարության աշխատակիցներին բռնի կերպով ստիպում են հավանել Իլհամ Ալիևի պաշտոնական էջը ֆեյսբուքում: Ընդ որում հավանելուց հետո բոլոր աշխատակիցները պարտավոր են այդ մասին տեղեկացնել նախարարության ներքին վերահսկողության բաժնին և, ի ապացույց, բացել ֆեյբուքյան էջերն ու ցույց տալ, որ հրահանգը կատարված է:

Աղբյուրը նշում է, որ սա «վերևից» տրված հրաման է, և ամենայն հավանականությամբ բոլոր պետական կառույցներում մարդկանց ստիպում են մուտք գործել նախագահի էջ և սեղմել «Like» կոճակը: Այս քայլն ամենայն հավանականությամբ ուղղված է լեգիտիմացնելու Իլհամ Ալիևին ընտրությունների նախօրեին և ցույց տալու միջազգային կառույցներին, որ նախագահի էջը տասնյակ հազարավոր մարդիկ են հավանել: