Վահան Հովհաննիսյանը չի բացառում, որ ամբիցիաները կարող են խանգարել ընդդիմադիրների միավորմանը

ՀՅԴ խմբակցության անդամ Վահան Հովհաննիսյանը «լրիվ կողմ է» Երևանի ավագանու ընտրություներին ընդիմադիր դաշտում գործող ուժերի միասնական ճակատով գնալու մոտեցմանը: Ավելին, վերջինիս վստահեցմամբ, հարցն արդեն պատրաստվում է ներառել ՀՅԴ խմբակցության օրակարգ, ասել է թե ` նախապատրաստական փուլում է:

«Ընդհանրապես միավորված ճակատով գնալը ավագանու ընտրություններին` համարում եմ ճիշտ»,- Panorama.am-ի հետ զրույցում նշեց պարոն Հովհաննիսյանը` մասնավորեցնելով,- « 4 ուժերի մասին դեռ ոչ մի բան չեմ լսել, բայց ես գտնում եմ` նրանք, ովքեր ներկա փուլում այս շարժման մեջ են, դրանց միավորման մասին է պետք խոսել առաջին հերթին, հետո` եթե կուզեն ուրիշներն էլ սատարել, դա արդեն քննարկմնա հարց է»:

Վահան Հովհաննիսյանը դժվարանում է կանխատեսել` ինչ կլինի այն ժամանակ, երբ պարզվի, որ Երևանի ավագանու ընտրություներում ԲՀԿ-ն կպայքարի միայնակ` առանց որևէ ուժի հետ կոնսոլիդացիոն համաձայնության:

«Դժվար է որևէ բան կանխատեսել, բայց ես մի բան գիտեմ, որ ավագանու ընտրութուներում միավորվելը ինչ- որ տեղ նույնիսկ ավելի հեշտ է, քանի որ այստեղ գաղափարական-քաղաքական տարաձայնություններն այդքան էական չեն: Ի վերջո, գնում ես քաղաքապետի պաշտոնը վերցնելու, թաղապետերի պաշտոնը վերցնելու, որտեղ բոլորովին էլ էական չէ` դու սոցիալիստ դաշնակցակա՞ն ես, թե՞ լիբերալ: Պարզապես պետք է պինդ մարդիկ լինեն, որպեսզի կարողանան դիմակայել օլիգարխների` քաղաքն ապականելու մղումներին, պետք է լինեն ազնիվ, անշառ, պրոֆեսիոնալ: Իսկ էդ տեսակի մարդկանց կարելի է գտնել տարբեր ուժերում, մնացածը` կազմակերպելու հարց է: Այդ առումով, կարծում եմ, միավորման հեռանկարները կան, գոյություն ունեն»:

Այն դիտարկմանը, որ սովորաբար ընդիմադիր դաշտի ուժերը վերջին պահին դժվարանում են միավորվել, քանի որ մշտապես դրան խանգարում են ամբիցիաները, պարոն Հովհաննիսյանն արձագանքեց. «Այո, միշտ խանգարել են: Չեմ բացառում ցավոք սրտի, որ հիմա էլ դա կարող է տեղի ունենալ, բայց առնվազն վստահեցնում եմ` ինչպես միշտ, գոնե այս անգամ էլ ամբիցիաներ դրսևորողները մենք չենք լինելու»:

Հարցի առնչությամբ ՀԱԿ-ի որևէ ներկայացուցչից այդպես էլ չհաջողվեց մեկնաբանություն ստանալ:

ԱԺ ՀԱԿ խմբակցությունից Գագիկ Ջհանգիրյանը Panorama.am-ի հետ զրույցում ասաց. «Ես հարցերի կպատասխանեմ մարտի 10-ից հետո` մարտի 1-ի դեպքերի ժամանակավոր հանձնաժողովի ստեղծման ժամանակ կամ դրանից հետո»: Մեր արձագանքին, թե հարցն այդ հանձնաժողովին չի վերաբերում, Գ. Ջհանգիրյանը պատասխանեց. «Դե առավել ևս, որ կապ չունի, ուրիշին հարցրեք»:

Իր հերթին, ԱԺ ՀԱԿ խմբակցության անդամ Ստեփան Դեմիրճյանն ասաց, որ զբաղված է և խնդրեց ավելի ուշ զանգել: Իսկ ՀԱԿ պատգամավորներ Արամ Մանուկյանը, Լյուդմիլա Սարգսյանը և ՀԱԿ անդամ Վահագն Խաչատրյանը չպատասխանեցին մեր հեռախոսազանգերին: