Քաղաքային իշխանությունների համար գիրքը սովորական մակուլատուրա է. Նաիրա Զոհրաբյան

Գրքի համաշխարհային մայրաքաղաք հանդիսացող Երևանում դուրս են շպրտել Երիտասարդականի գետնանցումում տասնյակ տարուց ավել երևանյան կարևոր մշակույթներից մեկը` գրքի տոնավաճառը: Այսօր ԱԺ հայտարարությունների ժամին` գրքի տոնավաճառի խնդիրը բարձրացնելիս ԱԺ ԲՀԿ-ական պատագմավորը հայտարարեց, որ այդ քաղաքականությունն իրականացնողների համար գիրքը «սովորական մակուլատուրա է»:

«Լավագույն դեպքում մակուլատուրա է, որի պետք է ազատվել: Մենք պետք է հասկանանք, որ մենք` Երևանում մեծացած մարդիկ, կարևորագույն մշակույթային պահապաններից մեկը պետք է լինենք», -հայտարարեց Զոհրաբյանը` հիշեցնելով, որ գրավաճառներին առաջարկվել է ձկան խանութի մոտակայքի «միզահոտ գետնանցումը»:

«Կարծում եմ ցանկացած իրեն հարգող հանրապետական թե տեղական իշխանություն այդ մարդկանց առանց որոշակի ժամկետ տալու դուրս վռնդելուց առաջ կանչեր, լսեր նրանց խնդիրները, տեղյակ լիներ նրանց առաջարկներին: Մարդիկ կոնկրետ առաջարկներ ունեն, ինչպես չկործանել Հայաստանում գրքի շուկան: Նրանց տեսակետները պետք է լսեին, սակայն որևէ նման բան չի արվել: Հակառակը, նրանց ուղղակիորեն դուրս են շպրտել և ասել են, որ լավագույն վայրը, որ կարող են առաջարկել միզահոտ գետնանցումն է, ուզում եք ուզեք, չեք ուզում, մի ուզեք», -հայտարարեց Զոհրաբյանը` նկատելով, որ ակնկալում են այն խորհրդարանականների աջակցությունը, որոնց համար գիրքը մակուլատուրա չէ: