Ներքին Կարմիրաղբյուրի տրակտորը տեղ չի հասել. Ծառուկյանն ամբողջությամբ չի կատարել խոստումը

Տավուշի մարզի սահմանամերձ Ներքին Կարմիրաղբյուր գյուղում կարտոֆիլի ցանքի աշխատանքների համար անհրաժեշտ Գագիկ Ծառուկյանի խոստացած տրակտորները տեղ չեն հասել: Ներքին Կարմիրաղբյուրի գյուղապետ Մանվել Կամենդատյանը մեզ հետ զրույցում պատմեց, որ մի առիթով «Բարգավաճ Հայաստան» կուսակցության պատգամավորները հետաքրքրվել են, թե գյուղն ինչ խնդիրներ ունի և երբ տեղեկացել են, որ տրակտոր է անհրաժեշտ խոստացել են ուղարկել: «Տրակտորը բերել են մարզ, բայց համայնքին չեն տվել, այլ տվել են իրենց ծանոթին, բարեկամին», -նկատեց Մանվել Կամենդատյանը` չմասնավորեցնելով, թե հատկապես ում են տվել:

Գյուղապետն ասաց, որ Տավուշի տարածաշրջանից ընտրված նախկին պատգամավոր Միքայել Վարդանյանը իրենց «լավ է նայել». Գազաֆիկացում ունեն, հանդիսությունների սրահն է կառուցվել, գույքն ունեն և եթե կարիք լինի կդիմեն, կարտոֆիլն էլ կունենան: «Մեր մոտ` սահմանում, կուսակցություն չկա: Եթե ուրիշները իմանում են, թե համայնքապետը իշխանամետ է, ոչ, նա աշխատում է ժողովրդի համար: Սահմանները միայն բանակը չէ, որ պետք է ամրանա: Այսպիսի նմանատիպ բաները հիասթափեցնում են ժողովրդին: Քանի որ նրանք բերել են ասել են կտան համայնքին ու չեն տվել, ինձ էլ հետաքրքիր չեն այդ տրակտորները», -հավելեց պարոն Կամենդատյանը:

Նշենք, որ ավելի վաղ նույն խնդիրն էր մատնանշել Ներքին Կարմիրաղբյուրի հարևան սահմանամերձ Այգեպար համայնքի գյուղապետ Անդրանիկ Այդինյանը: Նա, մասնավորապես, դժգոհել էր «Բարգավաճ Հայաստան» կուսակցության Բերդի տարածաշրջանի կռույցի ղեկավար Նինա Ադամյանի ինքնագործունեությունից: «Մարդ չի հասկանում, եթե Ծառուկյանն ասում ա գյուղացու կողքին կանգնած ենք, գյուղացուն ուզում ենք հույս տալ ու որ Նինա Ադամյանը Ծառուկյանի անունից ասում ա, թե իրավունք չունեն, որ անիվավոր տրակտորն օգտագործեն, էլ ինչի՞ ա պետքը, եթե տրակտորը մեզ ա հատկացրել ու ամբողջ հեռուստատեսությամբ էլ հայտարարել ա էդ մասին: Կամ Նինա Ադամյանն է իր անունը ոտնահարում, կամ էլ ընկեր Ծառուկյանը տեղեկություն չունի ինչ է կատարվում»,- տարակուսանք էր հայտնել գյուղապետ Այդինյանը:

Հարակից հրապարակում. Ծառուկյանի տրակտորը մտահոգություններ է առաջացրել Այգեպարում