«Առանձնահատուկ կրթության կարիք ունեցող երեխան հաշմանդամ չէ». քննարկումներ օրենքի շուրջ

«Հանրակրթության մասին օրենքը» Ազգային Ժողովում արդեն առաջին ընթերցմամբ անցել է, սակայն որոշակի մտահոգություններ այն դեռ իր մեջ պարունակում է: Դրանք քննարկելու, ինչպես նաև մինչև երկրորդ ընթերցումը նոր առաջարկություններ ներկայացնելու համար Հանրային ցանցն այսօր կազմակերպել էր «Հանրակրթության մասին օրենքում փոփոխություններ կատարելու մասին» հանրային քննարկում, որին մասնակցում էին ոլորտի պատասխանատուներ` ԱԺ-ից ու ԿԳ նախարարությունից, հասարակական կազմակերպությունների ներկայացուցիչներ, ուսուցիչներ և այլք:

Հանրային ցանցի համակարգող Թամարա Աբրահամյանը  նշեց, որ քննարկումը միտված է որոշակի հստակ առաջարկներ առաջ քաշելուն, որոնք ավելի կլավացնեն օրենքի նախագիծը, իսկ երկրորդ նախապայմանն այն է, որ օրենքի ընդունման գործընթացում կարևորվի հանրային կարծիքը. «Երբ օրենքի նախագիծը դրվում է քննարկման, ապա հետադարձ կապը միշտ չէ, որ ապահովվում է, ինչն էլ հետագայում խոչընդոտում է քաղհասարակության մոտիվացմանը»,- նշեց Թ.Աբրահամյանը:

Անցնելով կոնկրետ օրենքի նախագծին, համակարգողը ընդգծեց, որ օրինագիծ մշակելու լոբբինգը առաջ է քաշվել հկ-ների կողմից: Օրենքի փոփոխություններում նախատեսված են դպրոցների կառավարմանը վերաբերող դրույթներ, որոնք առնչվում են տնօրեններին, ինչպես նաև կառավարման այլ օղակներում` ծնողական և աշակերտական խորհուրդներին վերաբերող փոփոխություններ:

ԿԳ նախարարության իրավաբանական հանրակրթական վարչության գլխավոր մասնագետ Անահիտ Մուրադյանն էլ, նախ, ելույթը սկսեց անհամաձայնություն հայտնելով, թե քաղաքացիական հասարակությունը ակտիվ չէ և որպես օրինակ մատնանշեց ներառական կրթական համակարգի ներդրումը և առհասարակ` հաշմանդամություն ունեցող երեխաների կրթության իրավունքի իրացման բարելավմանը: Հիշատակեց նաև 1999թ-ը, երբ ընդունվեց կրթության մասին մայր օրենքը, որում էլ ամրագրվեց հասարակական կազմակերպությունների դերի ակտիվացումը կրթական ոլորտում:

Հանրային ցանցի ներկայացված հարցադրումները և դիտարկումները առաջնային վերաբերում են առանձնահատուկ պայմանների կարիք ունեցող անձանց կրթության իրավունքին: Մասնավորապես` առաջարկվում է օրենքի 2-րդ հոդվածից հանել «Կրթության առանձնահատուկ պայմանների կարիք ունեցող անձանց կրթության մասին» արտահայտությունը և փոխարինել այն «Հաշմանդամության կարգավիճակ ունեցող անձանց կրթության մասին»-ով:

Սակայն ԿԳ նախարարության ներկայացուցիչը դեմ է դրան.  «Ես կատեգորիկ դեմ եմ այս ամրագրմանը` հաշմանդամություն ունեցող երեխա: Ես համոզված եմ, որ եթե մենք ճիշտ աշխատենք առանձնահատուկ պայմանների կարիք ունեցող երեխայի հետ, նա հնարավոր է երբեք էլ չունենա հաշմանդամություն: Օրինակ, երեխան, որ խնդիր ունի խոսելու հետ, նա հաշմանդա՞մ է. ոչ»,- ընդգծեց նա:

Նշենք, հանրային քննարկումը կազմակերպվել է պետական կառույցների ու Ազգային Ժողովի հետ համագործակցող Հանրային ցանցի կողմից: Սակայն Ազգային Ժողովի Կրթության և գիտության հարցերի մշտական հանձնաժողովի նախագահը կամ նրա տեղակալը, կամ այլ պատգամավորներ քննարկմանը ներկա չէին, ԿԳ նախարարությունն էլ ներկայացված էր մասնագետի մակարդակով: Վերջինս էլ իր խոսքում նշեց, որ իր իրավասությունների մեջ «այնքան էլ չի մտնում օրենքի փոփոխություններ ներկայացնելը, բայց….»: