«Իսկ եթե մարդ աշխատանք չունի, ի՞նչ տոն». Երթի են դուրս եկել արհմիությունները

«Արժանապատիվ աշխատանք, արժանապատիվ աշխատավարձ», «Նվազագույն աշխատավարձը հավասարեցնել նվազագույն սոցիալական պահանջների», «Զբաղվածություն», «Արհմիությունների ուժը միասնության մեջ է»:

Այս պահանջներով ու կարգախոսներով քիչ առաջ Հյուսիսային պողոտա-Թումանյան խաչմերուկից մեկնարկեց Հայաստանի «Արհմիությունների կոնֆեդերացիա» արհեստակցական կազմակերպությունների հանրապետական միության մաս կազմող ճյուղային արհմիությունների, տարբեր հիմնարկների արհմիությունների անդամների երթը:

Մինչ երթի մեկնարկը հավաքվածները միմյանց շնորհավորում են, խոսում աշխատավարձերից ու աղքատավարձերից, միմյանց լավ ու արգասաբեր աշխատանք մաղթում:

Հանրապետական միության նախագահ Էդուարդ Թումասյանը հիշում է` կոմունիստների օրոք անցկացրած «մայովկաները», համեմատում այսօրվա հետ ու գալիս եզրակացության` տոնական տրամադրություն չկա:

«Առաջ մայովկա էին անում, ուրախություն էր: Մայիսի 1-ին շքերթ էր, մայիսի 2-ին քաղաքից դուրս էին գալիս, խնջույքներ էին անում: Գիտե՞ք ինչ, տոնը պետք է տոն դառնա: Իսկ եթե մարդ աշխատանք չունի, ի՞նչ տոն, նա չի էլ հիշի, որ այսպիսի բան կա: Տոնական տրամադրություն դեռ չի զգացվում, բայց ամեն տեղ չէ, որ տոնը այսպես խաղաղ ձևով է նշվում: Այսօր Հայաստանի աշխատողի համար երազանքի պես բան է`ապահով, անվտանգ, արժանապատիվ աշխատանք ունենալը ու դրա համարժեք վարձատրությունը»,-Panorama.am-ի հետ զրույցում ասաց Թումասյանը:

Նրա խոսքով, այսօր հայաստանցի աշխատողների մոտ եղած աշխատանքը կորցնելու վախ կա, այդ պատճառով էլ քիչ են դիմում արհմիություններին, դիմելու դեպքում էլ` խնդրում են իրենց անունները գաղտնի պահել:
«Արհմիությանը բացահայտ կերպով դիմում են այն ժամանակ, երբ ոտնահարված են իրենց իրավունքները: Այդ դեպքերում արհմիությանը պատրաստ է հասնել մինչև դատարան»,-ասաց Թումասյանը: Միության ղեկավարի խոսքով, պետական հատվածում աշխատողների իրավունքները քիչ թե շատ պաշտպանված են, իսկ մասնավոր սեկտորում, հատկապես սպասարկման ոլորտում, մարդիկ աշխատում են առանց պայմանագրի, օրինական հիմքերի:

Այսօր Թումասյանը մտահոգվում է հատկապես «Արմավիա»-ի ու Նաիրիտի աշխատակիցների ճակատագրով: Ցանկանում է, որ «հրաշք մասնագետները» չկորցնեն աշխատանքը, հակառակ դեպքում նրա կարծիքով, նրանք էլ կգնան երկրից:

Ի դեպ, «Նաիրիտ» ՓԲԸ-ի արհմկոմի նախագահ Հրաչ Թադևոսյանը, ով ևս մասնակցում էր երթին, հայտնեց, որ աշխատավարձի վճարման խնդիրը ճիշտ է կարգավորել բանակցությունների միջոցով, քանի որ այսօր ֆինանսներ չկան, իսկ դատարան դիմելուն կհաջորդի գործարանի սնանկացումը: «Մեր հիմնական նպատակը գործարանի վերագործարկումն է»,-ասաց Թադևոսյանը:

Հայաստանի պետական բուհերի արհեստակցական կազմակերպությունների ճյուղային հանրապետական միության նախագահ Գառնիկ Վաղարշակյանը Panorama.am-ի հետ զրույցում նկատեց, որ եթե բողոքում ու պահանջներ են ներկայացնում եվրոպական երկրների աշխատողները, ապա մենք լռելու իրավունք չունենք:
«Աշխատավոր մարդը պետք է կարողանա բերկրանք ստանալ իր աշխատանքից: Գաղտնիք չէ, որ գործազրկության մեծ թիվ ունենք, մեծ արտագաղթ ունենք ու բևեռացված հասարակություն ունենք, մենք չենք կարող հանդուրժել այն վիճակը, երբ մարդը մի քանի ամսվա աշխատավարձ չի ստանում: Հետաքրքրիր է, երբ իշխանությունները մեկ ամսվա աշխատավարձ չստանան, կկարողանա՞ն պարզ ճակատով նայել իրենց ընտանիքի անդամներին: Այսօր արհմիությունների կոնֆեդերացիան բարեփոխված գործողություններով ուզում է առաջնահերթություն դարձնի աշխատավոր մարդու անմխիթար վիճակը»,-ասաց Վաղարշակյանը:

Երթին մեծ ոգևորությամբ նախապատրաստվել էր հատկապես Բանկերի և ֆինանսավարկային հիմնարկների աշխատողների արհմիությունը` վերնաշապիկներ, գլխարկներ, դրոշակներ: Արհմիության նախագահ Լաուրա Հակոբյանի խոսքով, բանկային համակարգի աշխատակիցներն էլ ունեն խնդիրներ: Նրա խոսքով, պետք է կառուցողական մոտեցմամբ վեր հանել խնդիրներն ու դրանց լուծումներ տալ:
«Ի պատիվ մեր բանկային համակարգի ղեկավարների, պետք է ասեմ, որ նրանք սկսել են լուրջ վերաբերվել խնդրին, եթե նախկինում չէին լսում մեր ձայնը, ապա այսօր լսում են, փորձում են համագործակցել` խնդիրների լուծման համար»,-ասաց Լ. Հակոբյանը:

Նշենք, որ երթի մասնակիցները Հյուսիսային պողոտայով շարժվեցին դեպի Հանրապետության Հրապարակ, այնուհետև Վ.Սարգսյան փողոցով դեպի Շահումյանի անվան հրապարակ ու ՀԱՄԿ-ի շենք: