Աջափնյակում հաշմանդամություն ունեցող անձանցից խլել են քվեարկելու իրավունքը

Ամեն ընտրությունից առաջ հաշմանդամություն ունեցող անձանց իրավունքների պաշտպանության հասարակական բազմաթիվ կազմակերպություններ բարձրաձայնում են, որ ընտրական գործընթացում ոտնահարվում են հաշմանդամություն ունեցող անձանց իրավունքները: Այն է` ընտրատեղամասերը հարմարեցված չեն անվասայլակների համար, չկան հատուկ քվեաթերթիկներ տեսողության խնդիրներ ունեցող անձանց համար և այլն:

Թե’ անցած տարի խորհրդարանական ընտրությունների, թե’ փետրվարյան նախագահական ընտրությունների ժամանակ նկատել էինք, որ Աջափնյակի թիվ 22 դպրոցում տեղակայված թիվ 6/34- 6/35 ընտրատեղամասերի մուտքը հասանելի է հաշմանդամություն ունեցող անձանց համար` առկա է թեքահարթակ: Որքանով էր այն հարմար անվասայլակի համար` այլ խնդիր է: Սակայն այսօր առավոտյան այցելելով նշված ընտրատեղամասեր նկատեցինք, որ այս անգամ թեքահարթակը բացակայում էր:

Ընտրատեղամասում որևէ մեկը այդպես էլ չկարողացավ բացատրել, թե ինչու է բացակայում թեքահարթակը: Եվ այդպես էլ անհասկանալի մնաց` 17-րդ թաղամասում հաշմանդամություն ունեցող անձինք չկան (Աստված տա), թե այդ մարդկանց ուղղակի դուրս են թողել Երևանի ավագանի ընտրելու գործառույթից, քանի որ մինչ այսօր, ինչպես ցույց է տվել ժամանակը, որևէ քաղաքապետ լիարժեք չի մտահոգվել ու քայլեր չի ձեռնարկել հաշմանդամություն ունեցող անձանց խնդիրների լուծման և առհասարակ` նրանց առօրյան հեշտացնելու և իրենց լիարժեք քաղաքացի զգալու ուղղությամբ: