«Երիտասարդ գիտնականների աջակցության ծրագիր». «Վստահության հույս՝ գիտական ոլորտ ներխուժող երիտասարդների համար»

Հայաստանի նախագահի հովանու ներքո իրականացվող «Երիտասարդ գիտնականների աջակցության ծրագրի» ֆինանսավորումը հաջորդ տարի կրկնապատկվելու է՝ 100 միլիոն դրամից դառնալու է 200 միլիոն դրամ: Գումարի բարձրացումը կատարված աշխատանքից գոհ լինելու արդյունք է: Այս մասին երկրի ղեկավարին ծրագրի գործունեությունն ու ընթացիկ հաշվետվությունը ներկայացնելուց հետո ասաց ԵՊՀ երիտասարդ գիտնականների միավորման նախագահ, «Երիտասարդ գիտնականների աջակցության ծրագրի» ղեկավար մարմնի պատասխանատու քարտուղար Կառլեն Խաչատրյանը:

Ծրագրի ղեկավարները նախագահին ներկայացրել են մեկ տարվա ընթացքում կատարած աշխատանքի հաշվետվություն: Ծրագրի նպատակն է նպաստել Հայաստանի գիտության առաջընթացին և կադրային ներուժով համալրման գործընթացին, ինչպես նաև աջակցել հանրապետության երիտասարդ գիտնականների ստեղծագործական զարգացմանը: Կ. Խաչատրյանի ներկայացմամբ, ծրագիրն ունի չորս հիմնական ուղղվածություն՝ երիտասարդ գիտնականներին միջազգային գիտաժողովների ֆինանսական աջակցության տրամադրում, տեղում կազմակերպել երիտասարդ գիտնականների գիտաժողովներ, սիմպոզիումներ, դպրոցներ, գիտական դրամաշնորհների տրամադրում, մրցանակաբաշխության կազմակերպում:

«Ներկայացված հաշվետվությունից նախագահն ընդհանուր առմամբ գոհ էր, հիմնական շեշտադրումը կատարվեց արդյունքների չափելիության վրա և պայմանավորվեցինք հաջորդ տարվա համար մշակել հստակ արդյունավետության գնահատման չափանիշ»,- ասաց Կ. Խաչատրյանը:

ԳԱԱ երիտասարդ գիտնականներ խորհրդի նախագահ, Երիտասարդ գիտնականների աջակցության ծրագրի ղեկավար մարմնի անդամ Գևորգ Վարդանյանի խոսքով, բավականին լայն քննարկում է տեղի ունեցել: «Նախագահի կողմից հիմնական շեշտադրումը դրվեց, թե արդյոք նպատակահարմար է այս ծրագիրը, արդյոք հնարավոր չէ մշակել այնպիսի չափորոշիչներ, ծրագրեր, որոնք կոնկրետ արդյունք կտան»,-նշեց նա: Երիտասարդ գիտնականի դիտարկամբ, քանի որ ֆինանսավորման գումարը կրկնապատկվելու է, իրենք էլ պետք է նոր ծրագրեր մշակեն: «Ըստ իս, ավելի շատ շեշտը պետք է դրվի այնպիսի ծրագրերի վրա, որոնք կունենան կոնկրետ արդյունք, կբերեն կոնկրետ նոր ֆինանական ծավալների ավելացում: Ըստ իս, դա պետք է անել նաև միջազգային գիտական կազմակերպությունների հետ համագործակցելու տեսանկյունից»,- ասաց Գ. Վարդանյանը:

Հայաստանի պետական ճարտարագիտական համալսարանի ռեկտորի օգնական Հայկ Մամիջանյանի խոսքով, ծրագիրը լուծում է մի քանի կարևոր խնդիրներ. «Գումարը տրամադրվում է երիտասարդներին, երիտասարդները տնօրինում են երիտասարությանը տրամադրվող գումարը: Դա վստահություն է, որը մեզ տրվեց և վստահեցնում եմ, որ սեփական միջոցներ ծախսելը շատ ավելի դյուրին է, քան պետական: Երկրորդ՝ գիտական ոլորտ ներխուժող երիտասարդների համար վստահության հույս է. երիտասարդը, որը բուհն ավարտելով որոշում է զբաղվել գիտությամբ, գիտի, որ նախագահի կողմից խրախուսվող ուղղություն է»:

2012 թ հուլիսից մինչև 2013 թ. ապրիլ, մրցութային հիմունքներով երիտասարդ գիտնականների միջազգային գիտական գործուղումների համար ֆինանսավորվել է 48 հայտ, երիտասարդ գիտնականների գիտաժողովների, սիմպոզիումների, դպրոցների, սերմինարիների կազմակերպման համար ֆինանսավորվել է 24 հայտ, հրատարակվել է «Դարերի խորքից դեպի տիեզերք» գիտահանրամատչելի գիրքը, անցկացվել է գիտական լրագրության մրցույթ, երիտասարդ գիտնականների մրցանակաբաշխություն:

Պատասխանելով այն հարցին, թե հասարակությունն ինչպե՞ս կարող է տեսնել ծրագրի արդյունքները, Երևանի Մ. Հերացու անվան պետական բժշկական համալսարանից երիտասարդ գիտնական Խաչիկ Պետրոսյանն ասաց. «Գիտությունն այնպիսի ոլորտ է, որտեղ կարճաժամկետ ներդրումներով արդյունքներ պետք է սպասել բավականին ուշ: Տվյալ պարագայում, եթե ուզում ենք շոշափելի արդյունք տեսնել, մենք պետք է սպասենք»: Ըստ նրա, կարճաժամկետ արդյունքներ կան՝ երիտասարդ գիտնականի մոտիվացիոն խնդիրների վերհանում, անձնական մոտիվացիայի բարձրացում, երիտասարդի՝ իրեն գնահատված ու ուշադրության կենտրոնում գտնվելու կարևոր պայմանի առկայություն: «Իսկ եթե մեր գիտությունը կարիք ունի երիտասարդանալու, երիտասարդ գիտնականին պահելով ուշադրության կենտրոնում, կնպաստի աշխատունակության բարձրացմանը, տեղում ամրապնդվելուն»,- հազմոված է Խ. Պետրոսյանը: