Կարկուտի հետևանքով տուժած սոցիալապես անապահով յուրաքանչյուր ընտանիքի կհատկացվի 50 հազար դրամի չափով օգնություն

Արմավիրի մարզի կարկտահարության հետևանքով հարյուր տոկոս տուժած 23 գյուղերի սոցիալապես անապահով յուրաքանչյուր ընտանիքին կհատկացվի միանվագ դրամական օգնություն` 50 000 դրամի չափով: Այս մասին որոշումն ընդունվեց ՀՀ կառավարության այսօրվա նիստում:

Արմավիրի մարզի կարկտահարության հետևանքով տուժած սոցիալապես անապահով ընտանիքներին միանվագ դրամական օգնություն տրամադրելու նպատակով, ՀՀ կառավարության պահուստային ֆոնդի հաշվին ՀՀ աշխատանքի և սոցիալական հարցերի նախարարությանը ընթացիկ տարվա ինն ամսում կհատկացվի 80 մլն դրամ:

ՀՀ վարչապետ Տիգրան Սարգսյանն ասաց, որ Արմավիրի մարզում կարկտահարությունից 100 % տուժել են թվով 23 գյուղեր, որոնց բնակիչները հայտնվել են սոցիալ-տնտեսական ծանր վիճակում: Ըստ նրա` ՀՀ աշխատանքի և սոցիալական հարցերի նախարարության կողմից մշակված մեթոդաբանությունը տրամադրվել է նշված 23 համայնքների ղեկավարներին, որոնք հանձնաժողովներով ճշտել են այդ համայնքների առավել անապահով ընտանիքների ցուցակները: Այդ ցուցակներում ներառվել են 1606 ընտանիքներ:

Վարչապետը նշեց նաև, որ եթե ցուցակներում լինեն անճշտություններ, դրանք կկարգավորվեն:

Կառավարության մեկ այլ որոշմամբ` կարկտահարությունից տուժած գյուղացիների հողի հարկի և ջրի վարձի փոխհատուցման նպատակով կառավարության պահուստային ֆոնդից հատկացվեց համապատասխանաբար` 207 և 650 մլն-ական դրամ: