Ռուբեն Հայրապետյան. «Ռաֆայել Նազարյանն իրավունք չուներ նման բան ասել» (Տեսանյութ)

Այսօր ՀՖՖ նախագահ Ռուբեն Հայրապետյանը լրագրողների հետ հանդիպման ժամանակ Հայաստանի երիտասարդական հավաքականի գլխավոր մարզիչ Ռաֆայել Նազարյանի խոսքերը որակեց ոչ բարոյական: Վերջինս Իսլանդիայի ընտրանու հետ խաղից հետո հայտարարել էր, որ գոհ է իր սաների ցուցադրած խաղից, սակայն հաշիվն ամենևին այլ բան էր հուշում: Մեր տղաները պարտվել էին 1:2 հաշվով:

«Ինչպե՞ս կարող եմ կիսել Ռաֆայել Նազարյանի կարծիքը: Զարմանում եմ նրա խոսքերի վրա: Չեմ ցանկանում կոպիտ բառեր ասել: Պարտված խաղից հետո հնարավոր չէ գոհ լինել: Գտնում եմ, որ մարզիչն իրավունք չուներ նման բան ասել և դա բարոյական չեմ համարում»,- հայտարարեց Հայրապետյանը:

Այն հարցին, որ Դանիա-Հայաստան խաղից հետո դանիական մամուլը պահանջում է Մորտեն Օլսենի հրաժարականը և որ այդ մասնագետը 13 տարի շարունակ մարզում է ընտրանին, ճի՞շտ է արդյոք 1 խաղի արդյունքով նրան պաշտոնանկ անելը, Ռուբեն Հայրապետյանը պատասխանեց, որ դա Դանիայի և այդ երկրի ֆուտբոլի ֆեդերացիայի խնդիրն է: Ինքն ունի իր երկիրը, իր հավաքականը և իրեն հուզում են միայն այստեղ տեղի ունեցող խնդիրներն ու իրադարձությունները: