Թուրքիայի բանակից ազատվելու համար նախատեսվում է սահմանել 6.000 եվրո վճար

Ըստ «Ermenihaber.am» լրատվականի` Թուրքիայի վարչապետ Ռեջեփ Թայիփ Էրդողանը հանդիպել է արտասահմանաբնակ թուրքերի խորհրդի անդամների հետ: Քննարկումների օրակարգում եղել է զինծառայության փոխարեն վճարվելիք գումարի նվազեցման հարցը:

Խորհրդի անդամների կողմից առաջարկվել է այն սահմանել 5-6.5 հազար եվրո: Այդ նպատակով վարչապետի օգնական Բեքիր Բոզդաղը Թուրքիայի Պաշտպանության նախարարության օգնությամբ պատրաստել է առաջարկների փաթեթ, ըստ որի, վերոհիշյալ վճարի չափը սահմանվել է 6000 եվրո:

Եթե վարչապետի հաստատմանը ներկայացված առաջարկում որևէ փոփոխություն չկատարվի, ապա հենց այդ գումարն էլ կհաստատվի: Դա կնշանակի, որ պահանջվող գումարը վճարելու արդյունքում տվյալ անձն ազատվում է զինապարտությունից:

Բայց անկախ դրանից պարտադիր կերպով 21-օրյա զինվորական ուսուցում է անցնում: Այս օրենքը հիմնականում կիրառվում է արտագնա աշխատանքի մեջ գտնվողների նկատմամբ:

Մինչև 2011 թվականը վճարի ենթակա գումարը կազմել է 5.120 եվրո: Սակայն նույն թվականի դեկտեմբերին ընդունված որոշման համաձայն գումարը դարձավ 10000 եվրո, ինչպես նաև վերացվեց 21 օրյա զինվորական դասընթացը: