«Նորաշենի շրջանավարտները փայլել են պատմություն առարկայից, Տավուշինը՝ մաթեմատիկայից»

Այսօր, երբ արդեն հայտնի են բուհ ընդունված շրջանավարտների անունները, մարզերում փորձում են շրջանավարտների գնահատականների հիման վրա հետևություններ անել: Տավուշի մարզպետարանի կրթության, մշակույթի ու սպորտի վարչության պետ Աշոտ Փաշինյանի ներկայացմամբ, մարզի հանրակրթական ուսումնական հաստատություններում միասնական քննությունները Տավուշի մարզում անց են կացվել Իջևանի թիվ 1 և թիվ 4 դպրոցներում տեղակայված քննական կենտրոններում:

Մարզի 991 շրջանավարտից միասնական քննություններին մասնակցել է 689-ը: Անբավարար գնահատական է ստացել 120 դիմորդ: Քննությունների արդյունքում ամենաբարձր միջին միավորը գրանցվել է անգլերեն, ֆրանսերեն, գերմաներեն, կենսաբանություն և աշխարհագրություն առարկաներից: Ամենացածր միավորները եղել են ռուսաց լեզու և ֆիզիկա առարկաներից:

Ինչպես հաղորդում է մարզպետարանի պաշտոնական էջը, վարչության պետը նշել է, որ բարձր միավորներով աչքի են ընկել հատկապես գյուղական համայնքների շրջանավարտները: Մասնավորապես Նորաշենի շրջանավարտները փայլել են պատմություն առարկայից, Տավուշինը՝ մաթեմատիկայից: