Արմեն Աշոտյան. Ուսման վարձերի թանկացմանը ես ըմբռնումով եմ մոտենում

ԿԳՆ շենքի դիմաց պետական բուհերում վարձավճարների թանկացումից դժգոհող քաղաքացիներն այսօր այդպես էլ հրաժարվեցին ԿԳ նախարարի հետ հանդիպել սենյակային պայմաններում: Նրանք մնացին իրենց պահանջին, այն է` Աշոտյանը իջնի ներքև ու լսի իրենց: Աշոտյանն անդրդվելի մնաց, իսկ ակցիայի մասնակիցներից մի քանիսը, որ արդեն շենքի ներսում էին ու որոշել էին նախարարության պատերի ներսում հանդիպել նախարարին, վերջին պահին փոշմանեցին ու լքեցին շենքը:

Փոխարենը նախարարի հետ շփվելու հնարավորություն ունեցան լրագրողները: Նախարար Աշոտյանն ասաց, որ վարձավճարները թանկացել են հանրապետության հինգ բուհերում, միայն բակալավիրատ ու մագիստրատուրա նոր ընդունվածների համար: Աշոտյանի խոսքով՝ մի քանի տարի շարունակ իրենց միջամտության շնորհիվ է, որ հնարավոր է եղել խուսափել վարձավճարների բարձրացումից: Աշոտյանի խոսքով՝ այս տարի ընդունվածներն իմացել են ուսման վարձերի բարձրացման մասին:

«Ամեն տարի այս հարցը բարձրացվել է, և մենք իրենց խնդրել ենք, որպեսզի չբարձրացնեն: Ասել, որ կարող է ինչ-որ մեկը կողմ լինել ուսման վարձերի բարձրացմանը, առհասարակ անհեթեթ է, չի կարող բանական մարդը կողմ լինել թանկացումներին»,- ասել է նախարարը:

Արմեն Աշոտյանի խոսքով՝ կառավարությունը սոցիալական փաթեթ է մշակել մեղմելու համար ուսման վարձերի բարձրացման հետևանքները:

«Մեր գերագույն նպատակն է, որպեսզի ոչ մի լավ սովորող ուսանող վարձի պատճառով բուհից դուրս չմնա, երրորդ ուղղությունը բուհերի բյուջեների ծախսման թափանցիկությունն է, մենք պետք է ձեզ հետ միասին իմանանք, թե բուհերը, որոնք գանձում են ուսանողից ուսման վարձերը, ինչպես են այդ գումարները ծախսում»,- ասել է Արմեն Աշոտյանը՝ ավելացնելով, նախատեսվում է, որ «Փարոս» համակարգում ընդգրկված ընտանիքների երեխաների համար կգործի 50 տոկոս զեղչ, ավելացվելու են պետության համար գերակա մասնագիտությունների գծով պետպատվերի տեղերը:

«Մենք ունենք մասնագիտական շեղում՝ բոլորն ուզում են դառնալ իրավաբաններ, լեզվաբաններ, բայց դրանք գերակա ճյուղեր չեն»,- նկատեց նա:

Ի դեպ, Աշոտյանի խոսքով, առաջիկայում բուհերում նախատեսվում են կրճատումներ, քանի որ նրա ներկայացմամբ, բուհերի աշխատակազմերն այսօր 10-20 տոկոսով ուռճացված են, ոչ միայն դասախոսական կազմով, այլև սպասարկող անձնակազմի աշխատակիցներով:

«Բուհեր կան, որոնք այսօր շատ ծանր ֆինանսական վիճակում են: Իրենց կողմից ուսման վարձերի թանկացմանը ես ըմբռնումով եմ մոտենում»,- ասաց նա:

Նախորդող հրապարակում` Աշոտյանը պատրաստ է լսել ակցիայի մասնակիցներին, բայց նրանք վերև չեն բարձրանում