Տարոն Մարգարյանին առաջին անգամ դպրոց ուղեկցել են ծնողները (Լուսանկարներ)

Շուրջ 450 աշակերտների համար նախատեսված ՀՀ նախկին վարչապետ Անդրանիկ Մարգարյանի անունը կրող թիվ 29 ավագ դպրոցն այսօր ապահովված է անհրաժեշտ բոլոր պայմաններով:

Հիմնանորոգմանը զուգահեռ` ամբողջությամբ թարմացվել է նաև աշակերտական և ուսուցչական գույքը, անհրաժեշտ պարագաներով են համալրվել համակարգչային դասարանն ու առարկայական լաբորատորիաները: Կրթօջախը հիմնանորոգելու նպատակով ծախսվել է շուրջ 500 մլն դրամ։

Դպրոցի հանդիսավոր բացմանն այսօր մասնակցել են Երևանի քաղաքապետը, ԿԳ և քաղաքաշինության նախարարները, ԱԺ փոխնախագահը և այլք:

Դպրոցի համար հանդիսավոր օրը նշանավորվել է նաև բարերարներ, ՀՀ վաստակավոր բժիշկներ Կառլեն և Սառա Եսայանների աջակցությամբ դպրոցի բակում տեղադրված երջանկահիշատակ Անդրանիկ Մարգարյանի կիսանդրու բացումով: Հանդիսավոր բացման պատիվը վերապահվել է քաղաքապետ Տարոն Մարգարյանին և կիսանդրու հեղինակ ճարտարապետ Ալբերտ Սոխիկյանին:

Օրվա խորհրդի շրջանակում պատասխանելով լրագրողների հարցերին՝ Տարոն Մարգարյանը նշել է, որ, ինչպես ընդունված է հայկական ավանդական ընտանիքներում, իրեն ևս դպրոց առաջին անգամ ուղեկցել են ծնողները: Քաղաքապետը նաև հավելել է, որ այսօր էլ շարունակում է առաջնորդվել երջանկահիշատակ հոր սկզբունքներով ու պատգամներով:

«Առաջին հերթին միշտ մնալ հայ և շարունակել մեր մեծերի ավանդույթները: Պահպանել այն արմատները, որտեղից մենք սերում ենք ու առաջնորդվել հենց այդ սկզբունքով»,- ընդգծել է Տարոն Մարգարյանը:

Լուսանկարները` այստեղ: