Տ.Խզմալյան. Պետք չէ մտածել, որ մենք կվախենանք վարձու կամ մոլորված ոհմակից

«Մենք որոշեցինք չգալ, որպեսզի բախում չլինի քաղաքացիների միջև, բայց մենք, բնականաբար, շարունակելու ենք մեր պայքարը»,- Panorama.am-ի հետ զրույցում ասաց «Նախախորհրդարանի» նախաձեռնող անդամ Տիգրան Խզմալյանը:

Հիշեցնենք այսօր ժամը 13-ին Փակ շուկայի մոտ բողոքի ակցիա էր հրավիրված ընդդեմ այդեղ իրականացվող շինարարության, սակայն ակտիվիստները այդպես էլ շուկայի մոտ չեկան, քանի որ այդ տարածքում էին ԱԺ պատգամավոր Սամվել Ալեքսանյանի կողմնակիցները իրենց պահանջներով:

Տ.Խզմալյանի որակմամբ, այսօր տեղի ունեցածը ցուցամոլություն էր` մարդկանց շուկայի մոտ բերելը, նրանց տներից ու աշխատանից կտրելը.

«Ինչպե՞ս կարելի է մարդկանց շահագործել քաղաքական նպատակներով: Այ դա է հանցագործություն հասարակության դեմ, որովհետև քաղաքական պատերազմի առիթ է դրսևորվում: Բայց մենք, բնական է, դրանից կխուսափենք, որովհետև մեր նպատակը երկրի փրկությունն է, այլ ոչ թե մեկ շուկա կամ պուրակ փրկելը»,- նշեց նա ու ավելացրեց, որ ժողովուրդը պարզապես մոլորված է և նրանց էլ է հարկավոր փրկել:

Հարցին, թե եթե ամեն անգամ իրենք նման դիմադրություն հանդիպեն, ինչպիսին որ այսօր էր և որն էլ խոչընդոտեց իրենց ակցիան անցկացնել, ի՞նչ են պատրաստվում անել, Panorama.am-ի թղթակիցը նշեց, որ իրենց խնդիրը նախևառաջ շինարարությանը խոչընդոտելն է.

«Եթե շինարարությունը վերսկսվի, ապա մենք չենք վախենա ոստիկաններից, ինչպես և չենք վախեցել: Պետք չէ մտածել, որ մենք կվախենանք վարձու կամ մոլորված ոհմակից»,- շեշտեց նա:

Ինչ վերաբերում է այն հարցին, թե ինչ ծրագրեր ունեն առաջիկայի համար և մասնավորապես վաղվա, Տ.Խզմալյանը տեղեկացրեց, որ այս պահին իրենք լրիվ այլ խնդրով են մտահոգված և զբաղված.

«Մենք շատ մտահոգված ենք մեր ակտիվիստ Դմիտրի Հարությունյանի դատական գործընթացով, որովհետև այսօր առավոտից ոստիկանական բաժիններում հետևում ենք իրադարձություններին և մեր հիմնական ուժերն այնտեղ են: Մեր տվյալներով Դմիտրիին սպառնում է դատական հետապնդում , նաև կարծես մինչև 2 ամիս կալանք: Նրա կինն ու երեխան գտնվում են շատ ծանր հոգեբանական վիճակում, որովհետև զոհ են դարձել գիշերային ոստիկանական հարձակման. փորձում ենք ապահովել նրանց անվտանգությունն ու հանգստությունը»,- ասաց նա ու հավելեց, որ պատրաստվում են նաև այս խնդրի վրա հրավիրել հասարակական ուշադրության ալիքը ոչ միայն Հայաստանում, այլև Սփյուռքում:

Նախորդիվ` 
«Էս ակտիվիստներն ո՞ւր են». Սամվել Ալեքսանյանի կողմնակիցները պահանջում են բացել Փակ շուկան (տեսանյութը` քիչ անց)
Լուսանկարներն` այստեղ