Ա. Սուքիասյան. Հայկական կողմը պնդում է, որ կարտոֆիլի փորձաքննությունն իրականացվի երրորդ երկրում

Այս պահին հայ-վրացական սահմանին՝ Սադախլո անցկետում 14 բեռնատարներ՝ մոտ 350 տոննա բեռով սպասում են կարտոֆիլի՝ վրացական կողմի իրականացրած լաբորատոր փորձաքննության արդյունքներին: Այս մասին Panorama.am-ին հայտնեց ԳՆ սննդամթերքի անվտանգության պետական ծառայության մամուլի խոսնակ Արմինե Սուքիասյանը: Նա սխալ ինֆորմացիա է որակում տեղեկությունները, թե 17 բեռնատարի կարտոֆիլ վերադարձվելու է Հայաստան:

Ա. Սուքիասյանի խոսքով, վրացական կողմի՝ Հայաստանից արտահանված կորտոֆիլը գորշ փտումով վարակված լինելու և հետ վերադարձնելու մասին տարածած տեղեկություններից հետո ծառայության պետը խոսել է Վրաստանի ԳՆ պարենի ազգային գործակալության ղեկավարի հետ, իսկ բուսասանիտարիայի տեսչության պետը խոսել է վրացի իր պաշտոնակցի հետ:

«Քանի որ վրացական կողմը կամայական գործողություն է արել, հայկական կողմը պնդում է, որ կարտոֆիլի լաբորատոր փորձաքննությունն իրականացվի երրորդ երկրում՝ երկու կողմերի ներկայացուցիչների մասնակցությամբ: Իրենք ասել են, մենք համաձայն ենք, մնում է՝ ի կատար ածվի»,-ասաց ծառայության մամուլի խոսնակը, ավելացնելով, որ հավանաբար փորձաքննությունը կիրականացվի Ռուսաստանում:

Ծառայությունից վստահեցնում են, որ գորշ փտում հիվանդություն Հայաստանում ընդհանրապես չկա: Նախորդ անգամ էլ 50 տոննա հետ ուղարկված կարտոֆիլը Հայաստանում կրկնակի նմուշառման է ենթարկվել, լաբորատոր հետազոտության ենթարկվել, սակայն պարզվել էր, որ կարտոֆիլը վարակված չէ:

Նախորդող հրապարակումներ՝

Բախչագուլյանի այցն արդյունք չտվե՞ց. Ծառայությունը դեռ հայտարարություն կանի

Կարտոֆիլային պատերա՞զմ. «Պատերազմները հո միայն զենքո՞վ չեն լինում»