Շտապօգնության նոր հայեցակարգը էապես կնպաստի ոլորտի զարգացմանը. նախարար

Առաջիկայում ներկայացվելու է շտապօգնության նոր հայեցակարգը, որը էապես կնպաստի ոլորտի զարգացմանը։ Այս մասին ասել է առողջապահության նախարար Դերենիկ Դումանյանը «Շտապբուժօգնություն» ՓԲԸ Կենտրոն ենթակայանում բուժաշխատողների հետ հանդիպման ժամանակ:

Երևանի քաղաքապետարանի տեղեկատվության և հասարակայնության հետ կապերի վարչությունից հայտնում են, որ ՀՀ Առողջապահության նախարար Դերենիկ Դումանյանը և Երևանի քաղաքապետի տեղակալ Դավիթ Օհանյանը այցելել են Երևանի «Շտապբուժօգնություն» ՓԲԸ Կենտրոն ենթակայան, հանդիպել բուժաշխատողների հետ։ ՀՀ ԱՆ Դերենիկ Դումանյանը, իր և ողջ նախարարության անունից շնորհակալություն հայտնելով շտապօգնության բուժաշխատողներին կատարած ամենօրյա հսկայական աշխատանքի համար, նշել է, որ հանդիպման նպատակը անմիջական շփումը և շտապօգնության բուժաշխատողների խնդիրներին ու առաջարկներին ծանոթանալն է։

«Մեզ հետաքրքրում են ձեր խնդիրները, որոնք կարող ենք միասին լուծել։ Մեզ անշուշտ մտահոգում է նաև վերջերս տեղի ունեցած միջադեպը, երբ քաղաքացին ծեծի էր ենթարկել իր պարտականությունը պատշաճորեն կատարող շտապօգնության բժշկին, և ուզում եմ վստահեցնել, որ պայքարելու ենք, որ այդպիսի դեպքերը բացառվեն»,- նշել է նախարարը։

Դավիթ Օհանյանը շնորհակալություն է հայտնել նախարարին մշտական ուշադրության, ինչպես նաև այս հանդիպումը նախաձեռնելու համար։ Քաղաքապետի տեղակալը ևս անդրադարձել է միջադեպին՝ նշելով, որ կա Երևանի քաղաքապետ Տարոն Մարգարյանի հստակ հանձնարարականը՝ անել հնարավորը այսուհետ նման անցանկալի դեպքերը բացառելու ուղղությամբ։

«Երևանի քաղաքապետարանը խստորեն դատապարտում է նման դեպքերը և հետևողական է լինելու որպեսզի մեղավորները պատասխանատվության ենթարկվեն օրենքի ողջ խստությամբ»,- նշել է Դավիթ Օհանյանը։