Հայաստանում մասսայականորեն խախտվում են մարդու սոցիալական իրավունքները. Մարդու իրավունքների առաջին պաշտպան

Հասարակության շրջանում մարդու իրավունքների պաշտպանության առումով ներկայումս բարձր իմացություն կա, ինչը դրական է, քանի որ երկիրը սկսում է դառնալ իրավական պետություն: Մարդու իրավունքների պաշտպանության օրը Panorama.am-ի թղթակցի հետ զրույցում վերլուծելով Հայաստանում մարդու իրավունքների պաշտպանության վիճակը, ասաց Մարդու իրավունքների առաջին պաշտպան Լարիսա Ալավերդյանը:

Միևնույն ժամանակ, տիկին Ալավերդյանը փաստում է` Հայաստանում մարդու իրավունքները շարունակում են խախտվել: Նախ ըստ ՄԻ առաջին պաշտպանի մեր երկրում կոպտորեն խախտվում է մարդկանց սոցիալական իրավունքները: «Սոցիալական իրավունքների առումով, լինի դա նվազագույն աշխատավարձի շեմը, աղքատության շեմը, դա անշուշտ խոսում է իրավունքների մասսայական, զանգվածային ոտնահարումների մասին: Հենց դրանից է բխում այն վատ վիճակը, որ մենք ունենք ժողովրդագրական առումով»,- ներկայացրեց Լարիսա Ալավերդյանը:

Բացի մարդկանց սոցիալական իրավունքներից, Հայաստանում, ըստ Ալավերդյանի, խախտվում են նաև մարդկանց տնտեսական իրավունքները: «Արդեն ապացուցված է, որ ցավոք սրտի, Հայաստանում ազատ շուկայական հարաբերություններ չկան և այդ առումով դեռ վիճակը վատ է, իսկ դա նշանակում է, որ մարդկանց տնտեսական իրավունքները ևս ոտնահարվում են», -նշեց Լարիսա Ալավերդյանը:

ՌԴ նախագահ Վլադիմիր Պուտինի այցի օրը Մաքսային Միությանը` Հայաստանի անդամագրվելու դեմ ակցիայի մասնակիցներին կոպտորեն ոստիկանության բաժիններ տանելը, ըստ Մարդու իրավունքների առաջին պաշտպանի, ցույց տվեց, որ Հայաստանում խախտվում են նաև մարդկանց քաղաքական ու քաղաքացիական իրավունքները:

«Այս պարագայում պետք է ասեմ, որ ես նախ և առաջ պաշտպանելու եմ ոստիկանների իրավունքները` չի կարելի, որ գործող իրշխանությունները օգտագործեն անընդհատ ոստիկանությանը, ոստիկաններին` որպես իրենց ապաշնորհ քաղաքականության ծածկ: Այստեղ ես խնդիր եմ տեսնում», -նկատեց Լարիսա Ալավերդյանը` հիշեցնելով Կոմիտաս 5-ի, Սայաթ-Նովա 10-ի դեպքերը, երբ ոստիկանները առաջին գծում էին:

Մարդու իրավունքների առաջին պաշտպանը հետադարձ հայացք է գցում և փաստում է, որ այժմ փոխվել են միայն մարդիկ ու դարձել են ակտիվ իրենց իրավունքների պաշտպանության հարցում: «Դա ինձ հույս է ներշնչում, որ մենք կփոխենք: Իշխանության կողմից այդ կարծրատիպերը մնում են նույնը», -հավելեց առաջին պաշտպանը:

Նշենք, որ դեկտեմբերի 10-ին ամբողջ աշխարհը նշում է Մարդու իրավունքների պաշտպանության օրը։ 1948 թվականի դեկտեմբերի 10-ին ՄԱԿ-ը ընդունել է Մարդու իրավունքների համընդհանուր հռչակագիրը։ Հռչակագիրը թարգմանվել է 375 լեզուներով ու բարբառնորով և համարվում է իրավունքների առաջին գլոբալ սահմանումը, որով օժտված են բոլոր մարդիկ։ Բաղկացած է 30 հոդվածներից և Տնտեսական, սոցիալական ու մշակութային իրավունքների մասին միջազգային դաշնագրերին, Քաղաքացիական և քաղաքական իրավունքների մասին միջազգային դաշնագրերին հավասար երկու կամընտիր արձանագրություններով համարվում է Մարդու իրավունքների միջազգային օրինագծի մի մասը։