Դավութօղլու. «Ֆրանսիան և Մեծ Բրիտանիան անհանգստացած են Թուրքիայի հզորացումից»

Թուրքիայի արտգործնախարար Ահմեթ Դավութօղլուն երկրում ծագած կոռուպցիոն սկանդալի կապակցությամբ ասել է, թե դա տեղի է ունեցել արտաքին ուժերի հրահրմամբ:  Նա մասնավորապես նշել է, որ Ֆրանսիան և Մեծ Բրիտանիան անհանգստացած են Թուրքիայի հզորացումից:

«Այնպիսի կացություն է ստեղծվել, որ արդեն կասկածանքով ենք աջուձախ նայում: Մենք թույլ չենք տա, որ իշխանությունը տապալվի Թուրքիայում», ասել է Դավութօղլուն «Սաբահ»ի թղթակցի հարցերին պատասխանելիս:

Վարչապետի գլխավորած իշխանական «Արդարություն և զարգացում» կուսակցության ճգնաժամային դրության վերաբերյալ արտգործնախարար Դավութօղլուն ասել է, որ դա շուտով կհաղթահարվի, անհրաժեշտ բոլոր միջոցները կձեռնարկվեն: