Ամուսինն ասել է, որ միայն պտղի համար մոր կյանքը պահելը իմաստ չունի

Հղի ամերիկուհու ամուսինն ու ծնողները դատի են տվել բուժհաստատությանը, որտեղ բժիշկները շարունակում են սարքավորումներով արհեստականորեն  ողջ պահել կնոջը` հակառակ նրա կամքի:

Նոյեմբերի 26-ին Տեխաս նահանգի 33-ամյա բնակչուհին գիշերն արթնացել է երեխայի լացից: Կինը 15 շաբաթական հղի էր: Ամուսնու փոխանցմամբ, որոշ ժամանակ անց արթնանալով և տեսնելով, որ կինը կողքին չէ, սակայն երեխան շարունակում է լաց լինել, գնացել է նրա հետևից և խոհանոցի հատակին հայտնաբերել է կնոջն առանց գիտակցության: Թե որքան ժամանակ է այդ վիճակում կինն անցկացրել, հայտնի չէ:

«Մեդպորտալ.ռու»-ի հաղորդմամբ, կնոջը շտապ տեղափոխել են հիվանդանոց, որտեղ բժիշկները արձանագրել են գլխուղեղի մահ, սակայն պտուղը շարունակում էր ապրել: Կնոջը միացնում են սարքավորումներին, թեև ամուսինը դեմ է լինում դրան: Ամուսնու պարզաբանմամբ` իրենք բժիշկներ են եղել և պայմանավորվել էին, որ եթե ամուսիններից մեկը կոմայի մեջ լինի, ապա մյուսը հնարավորություն կտա նրան մահանալ: Բացի այդ նա ասել է, որ միայն պտղի համար մոր կյանքը պահել իմաստ չունի:

Սակայն Տեխաս նահանգի օրենքների համաձայն` հղիությունը պարտադրում է բուժհաստատությանը, նույնիսկ հակառակ կնոջ կամքի, պահպանել նրա կյանքը: Ինչից ելնելով էլ հիվանդանոցը հրաժարվում է անջատել սարքավորումները:

Կնոջ ամուսինն ու ծնողները դատի են տվել բուժհաստատությանը` պնդելով, որ այս դեպքում գործում է նաև այն օրենքը, որ եթե հիվանդի գլխուղեղը մահացել է, ապա դա արդեն հնարավորություն տալիս է անջատել սարքավորումները:

Աշխարհին հայտնի են նման դեպքեր, երբ գլխուղեղի մահ արձանագրած հղիների մոտ առողջ երեխաներ են ծնվում: Վերջին նման դեպքը տեղի է ունեցել Հունգարիայում անցած նոյեմբերին. 31-ամյա կնոջ մոտ, որը նույնպես 15 շաբաթական հղի է եղել, գլխուղեղի մահ է ախտորոշվել, սակայն օրգանիզմի կենսական ֆունկցիաների պահպանման արդյունքում 12 շաբաթ անց նրանց մոտ ծնվել է առողջ երեխա: