Գևորգ Կոստանյանը խոստացավ հաջորդ շաբաթ հանդիպել բանակում մահացած զինծառայողների մայրերի հետ

ՀՀ գլխավոր դատախազ Գևորգ Կոստանյանն այսօր կառավարության մոտ հանդիպեց բանակում մահացած զինծառայողների ծնողներին, լսեց և պատասխանեց նրանց հարցերին:

2007 թվականին բանակում զոհված զինծառայող Տիգրան Օհանջանյանի մայրը՝ Գոհար Օհանջանյանը դատախազի հետ զրույցում ասաց, որ քրեական գործը արդեն 7 տարի նախաքննության ընթացքում է և յոթ տարի փաստաբան չեն կարողանում պահել:

Գ.Կոստանյանը Տիգրան Օհանջանյանի մորն ասաց, որ ինքը պատրաստ է ցանկացած իրավաբանի հետ «իրավաբանական հարթության մեջ քննարկել փաստերը»:

«Երբ դուք զինվորական դատախազ էիք, մենք այդ հարցերը բարձրացրել ենք, բայց այսքան ժամանակ է անցել, մենք ոչ մի հարցի պատասխան չունենք», -արձագանքեց տիկին Գոհարը` նկատելով, որ գործով կան նոր երևան եկած հանգամանքներ:

«Այդ հանգամանքների շուրջ մենք բազմիցս քննարկել ենք ու Ձեր իրավաբանի ներկայությամբ սպառիչ ներկայացրել ենք մեր դիրքորոշումը: Քննարկել ենք միաժամանակ նոր քննչական գործողություներ կատարելու անհրաժեշտությունը: Եթե դուք գտնում եք, որ դարձյալ լրացուցիչ հանգամանքներ կան, էլի քննարկենք, տիկին Գոհար»,- ասաց գլխավոր դատախազը:

Սպանված զինծառայողի մոր և գլխավոր դատախազի միջև զրույցի արդյունքում Կոստանյանն առաջարկեց իրավաբանի օգնություն, որին տիկին Գոհարը համաձայնեց, և նրանք պայմանավորվեցին հանդիպել հաջորդ շաբաթ:

«Եկող շաբաթվա մեջ ես կհրավիրեմ, լա՞վ», -ասաց գլխավոր դատախազը և ստանալով Գոհար Օհանջանյանի դրական պատասխանը ավարտեց զրույցը նրա հետ:

Բացի տիկին Գոհարից, Կոստանյանը նաև մյուս զոհված զինծառայողների մայրերի հետ խոստացավ հանդիպել:

«Ես նորից եմ ասում` ցանկացած գործ, այդ հանցագործությունների հետ կապված, կքննարկենք: Ուզում եք հրապարակային, այդ թվում` լրատվամիջոցների մասնակցությամբ, ես պատրաստ եմ, ինձ համար որևէ խնդիր չկա»,- նշեց Գ.Կոստանյանը:

Ծնողները այս առաջարկին ևս դրական արձագանքեցին:

Նախորդող`

Գ. Կոստանյանը զրուցել է զոհված զինծառայողների մայրերի հետ (տեսանյութ)