Կարծիքներ. ԿԽՄԿ-ն գերու առողջականի մասին մեկնաբանություններ չունի

Կարմիր խաչի միջազգային կոմիտեի (ԿԽՄԿ) հովանու ներքո իրականացված աշխատանքների արդյունքում մարտի 4-ին Հայաստան հայրենադարձված Մամիկոն Խոջոյանի առողջական վիճակը շարունակում է ծանր մնալ: Մամիկոն Խոջոյանն այս պահին գտնվում է Իջևանի բժշկական կենտրոնում և առողջական լուրջ խնդիրներ ունի:

Վերոնշյալ թեմայի առնչությամբ Panorama.am-ը ԿԽՄԿ հայաստանյան պատվիրակության հաղորդակցման ծրագրերի պատասխանատու Զառա Ամատունուց հետաքրքրվեց, արդյո՞ք ԿԽՄԿ-ն իրավասու է զբաղվել Ադրբեջանից տարբեր վնասվածքներով հայրենադարձված Մամիկոն Խոջոյանի խնդիրներով:

«Մեր հիմնական առաքելությունը ՀՀ քաղաքացու հայրենադարձման խնդիրն էր, ինչն իրականացվել է: Խոջոյանի առողջական վիճակի հետ կապված մեկնաբանություններ չեմ կարող անել»,- նշեց Զ. Ամատունին:

Վերջինս մտահոգիչ համարելով գերիների առողջական խնդիրները, նշեց, որ ԿԽՄԿ-ն որպես կանոն, հայրենադարձումից հետո շարունակում է կապ պահպանել գերու ընտանիքի հետ:

«Մենք հնարավորության դեպքում նաև աջակցում ենք սոցիալական և առողջապահական հարցերում, սակայն դա մեր գլխավոր առաքելությունը չէ»,- հավելեց նա:

Հաշվի առնելով այն հանգամանքը, որ Պատանդների, անհայտ կորածների և գերիների հանձնաժողովը գլխավորում է պաշտպանության նախարար Սեյրան Օհանյանը, Panorama.am-ը նախարարի մամուլի խոսնակ Արծրուն Հովհաննիսյանից փորձեց ճշտել, թե գործին ի՞նչ ընթացք է տրվելու:

Վերջինս նախ նշեց, որ Խոջոյանի վիճակը բավականին ծանր է. «Բացի նրանից, որ ՀՀ քաղաքացուն խոշտագումների են ենթարկել, Ադրբեջանում այնպիսի «բուժում» են իրականացրել, որ Խոջոյանի վիճակը բավականին բարդ է»:

Վերջինս նշեց, որ հանձնաժողովում աշխատանքներ են ընթանում և առաջիկայում հստակ կորոշվի, թե հարցը կոնկրետ, որ ուղղությամբ կընթանա:

«Ընդդեմ իրավական կամայակության» ՀԿ ղեկավար Լարիսա Ալավերդյանն այսօր հայտարարել է, որ Մամիկոն Խոջոյանի հարցով պատրաստվում են դիմել Մարդու իրավունքների եվրոպական դատարան:

Նախորդիվ`

Գերու նկատմամբ բռնությունը` լուրջ ազդանշան