«Հարձակվեցին ու սկսեցին դիպուկահարներով խփել, մարդ չմնաց». Ինչպես տարհանվեցին Քեսաբի հայերը

«Մեր հայ տղաներն արաբների հետ միասին պաշտպանում էին մեզ, խմբեր էին կազմակերպել, հսկում էին բոլոր սահմանային կետերը: Իրենք տեղեկություն ստացան, որ ինչ-որ բան է լինելու Թուրքիայի կողմից: Այդ սահմանները պաշտոնապես Թուրքիան է հսկում: Տեղեկացան և բոլոր ընտանիքներին արագ լուր տվեցին: Առավոտ շուտ արթնացրին բոլոր ընտանիքներին ու բոլորս շարժվեցինք Լաթաքիա»,- Panorama.am-ի թղթակցին պատմում է Քեսաբից տեղահանված ու Լաթաքիայում ապաստանած Հասմիկ Մանջիկյան-Բերբերյանը:

Թողնում են տները՝ դռները փակ, ամբողջ ունեցվածքը մեջը: Շատերը կան, որ նույնիսկ անձնագիր չեն վերցրել: Միայն թե փրկվեին: Ծայրահեղականները տարբեր կողմերից թափանցում էին:

«Թուրքն արեց իր անելիքը, փշալարարերը հանեց: Մինչև հիմա թուրքն իր սև գործն է անում: Իրենք հարձակվեցին ու սկսեցին դիպուկահարներով խփել, զենքերով կրակել, Քեսաբում մարդ չմնաց: Բոլորս տեղահանվեցինք»,- ասում է նա և շարունակում,- «Եկանք Լաթաքիա, այն մարդիկ, ովքեր ազգականներ ունեն այստեղ, զանգահարեցին և ապաստանեցին նրանց տանը: Մյուսների համար եկեղեցու դռները բացվեցին»:

Բոլորին օգնություն է բաժանվում շատ արագ, պետությունն ու հայկական կազմակերպությունները ոտքի են ելնում: Ծածկոցներ, առաջին անհրաժեշտության պարագաներ են տալիս: Սնունդ են բերում, տիկինները ճաշ են եփում և մինչև հիմա էլ երեք անգամ օրական սնունդ են տալիս:

Հասմիկ Մանջիկյան-Բերբերյանի խոսքով, շատ են եկեղեցում ապաստանածները: Ազգականների տանն ապաստանածների թիվն էլ է մեծ:

Հասմիկ Մանջիկյան-Բերբերյանը հետնորդն է այն սերնդի, ում Քեսաբից տեղահանել էին 1915-ին. «Իմ պապը եղբայրների հետ տեղահանվել են և աքսորի ճանապարհն են բռնել, Լաթաքիայով հասել են Հորդանան: Ճանապարհին շատ երեխաներ, ծերեր են մահացել: Պապիկիս եղբայրներն այդ ժամանակ գաղթի ճանապարհին մահացել են, միայն պապիկս է ողջ մնացել: Հետո, երբ խաղաղվել է, վերադարձել են իրենց տուն»:

Քեսաբից այն ժամանակ տարհանվածներից շատերը այս պատերազմի ընթացքում Քեսաբ էին ետ փախել-եկել Հալեպից. «Հիմա չգիտեն ինչ անել, երկրորդ անգամ այսպիսի ցավալի վիճակի առաջ են կանգնում Հալեպի հայերը»:

Հ.Գ. Դամասկոսի թեմի առանորդ Տ. Արմաշ եպիսկոպոս Նալբանդյանի տնօրինությամբ այս օրը հայտարարված է Քեսաբի խաղաղության և աղոթքի օր:

Կարդացեք նաև`

«Լաթաքիայի վրա հարձակում այս պահին չկա»

Քեսաբի հայ. Թուրքիայից մեքենաներով գալիս են, կողոպտում են տները և տանում մեր ունեցվածքը

Հայաբնակ Քեսաբի վրա հարձակման մեջ չեչեննե՞ր են ներգրավված

«Քեսաբ ներխուժումը հայության` մասնավորապես սիրիահայ համայնքի դեմ ուղղված քայլ էր»

Սիրիահայ. Ամեն վայրկյան սպասվում է Լաթաքիայի դեմ հարձակումը

Առաջ եկող զուգահեռները սթափեցնող պետք է լինեն. Սերժ Սարգսյանի հայտարարությունը` Քեսաբի իրադարձությունների վերաբերյալ

Քեսաբի հայերին օգնություն է անհրաժեշտ, հայկական կողմը քայլեր ձեռնարկում է