Իրանում ՀՀ դեսպան. Ռոհանիի՝ իշխանության գալով հայ-իրանական կապերի զարգացման համար ավելի նպաստավոր պայմաններ են ստեղծվել

«Միջազգային կառույցներում Հայաստանն Իրանի դիրքորոշմանն աջակցում է»,-այդ մասին իրանական «ԻՌՆԱ» լրատվական գործակալության հաղորդմամբ՝ հայտարարել է Իրանում ՀՀ դեսպան Գրիգոր Առաքելյանը:

Դեսպան Առաքելյանը, անդրադառնալով հայ-իրանական հարաբերությունների ներկա մակարդակին, նշել է, որ Հասան Ռոհանիի՝ իշխանության գալուց հետո երկկողմ հարաբերությունների զարգացման և խորացման համար ավելի նպաստավոր պայմաններ են ստեղծվել:

Շարունակելով խոսքը՝ Գ. Առաքելյանը հավելել է. «Միջազգային կառույցներում Հայաստանն Իրանի դիրքորոշմանն աջակցում է. Մենք շատ հարցերում ունենք մոտ դիրքորոշում և միմյանց հետ արդյունավետ համագործակցում ենք միջազգային կառույցներում: Հայ-իրանական կապերը հարևանների լավագույն հարաբերությունների օրինակներից մեկն է»:

Անդրադառնալով տնտեսական հարաբերությունների զարգացմանը՝ դեսպան Առաքելյանը նշել է, որ սեպտեմբերին Թեհրանում նախատեսվում է անցկացնել հայ-իրանական միջկառավարական հանձնաժողովի նիստը: