«Երեխու նման լացում ա». Մամիկոն Խոջոյանը դեռ չի կազդուրվել

Ադրբեջանական գերության մեջ մի քանի ամիս անցկացրած Մամիկոն Խոջոյանի առողջական վիճակը վատացել է, չի կարողանում քայլել, իսկ վիրահատած ձեռքն ամբողջությամբ ուռել է: Այդ մասին Panorama.am-ի թղթակցի հետ զրույցում տեղեկացրեց նրա դուստրը՝ Հեղինե Խոջոյանը:

«Վիրահատած կուռն ամբողջն ուռել ա, ահավոր ցավում ա, տեղաշարժ չի կարում ըլնի, երեխու նման լացում ա»,- ասաց տիկին Հեղինեն՝ նշելով, որ իրենց մոտ աշխատող բժիշկները մեկ-մեկ գալիս նայում են, վիրակապ են դնում ու գնում:

«Զգում ենք, որ էն Մամիկոնը չի, ուռած վիճակում ա, չենք հասկանում ինչ ա կատարվում հետը: Տեղից վերցնում ենք, դնում աթոռին, հետո տանում անկողին, զուգարան չի կարում գնա»,- ասաց Տավուշի մարզի Վերին Կարմիր աղբյուր գյուղի բնակիչը:

Նրա խոսքով, սոցիալական պայմանները ծանր են և հազիվ են հասցնում Մամիկոն Խոջոյանին անհրաժեշտ հիգիենիկ պարագաները գնել:

Խոջոյան պապի դուստրը աղոտ կասկածներ ունի, որ Ադրբեջանում նրան «սալյարկա» են ներարկել, սակայն բժիշկների հետ այդ մասին չի խոսել:

«Մենք, որ հիվանդանոցում ասում էինք արյան անալիզի պատասխանները տվեք, տեսնենք, չէին տալիս: Ինձ թվում ա, որ սալյարկա են ներարկել, որտև էս մարդը մի ուրիշ ձև ա փոխվում»,- փոխանցեց տիկին Հեղինեն:

Հիշեցնենք` 2014-ի հունվարի 28-ին, ՀՀ քաղաքացի Մամիկոն Խոջոյանը, Տավուշի մարզի Վերին Կարմիր Աղբյուր գյուղի մոտակայքի տեղանքում չկողմնորոշվելու և Հայաստանի պետական սահմանը հատելու ու Ադրբեջանի Հանրապետության տարածք անցնելով, գերևարվել էր Ադրբեջանի զինված ուժերի զինծառայողների կողմից, և գերության մեջ մնացել մինչև մարտի 4-ը:

Հարակից հրապարակում՝

Մամիկոն Խոջոյանն առաջիկա օրերին դուրս կգրվի հիվանդանոցից