Հասմիկ Պողոսյանը՝ Անաստաս Միկոյանի հուշարձանի տեղադրման մասին. «Պետք է մի քիչ խորամանկ լինենք»

«Հայազգի գործիչների մասին որևէ բան ասելուց առաջ պետք է մտածել, թե ինչ ազդեցություն կունենա միջազգային ասպարեզում: Մի քիչ զգույշ պետք է լինենք, մի քիչ խորամանկ, սուս-փուս քննարկենք, հասկանանք, կշռադատենք ու նոր որոշումներ ընդունենք»,- Հաղթանակի զբոսայգում լրագրողների հետ ճեպազրույցում նման կարծիք հայտնեց մշակույթի նախարար Հասմիկ Պողոսյանը՝ պատասխանելով հարցին, թե ի՞նչ կարծիք ունեք Երևանի ավագանու որոշման՝ Անաստաս Միկոյանի կիսանդրին կանգնեցնելու վերաբերյալ:

Հիշեցնենք՝ որոշումը Երևանի ավագանին կայացրել էր ապրիլի 30-ի նիստում՝ Մշակույթի, կրթության և սոցիալական հարցերի մշտական հանձնաժողովի տված դրական եզրակացության հիման վրա: Որոշմանը դեմ էին քվեարկել Հանրապետական խմբակցության անդամ Հայկ Դեմոյանը և «Բարև Երևան» դաշինքը:

Նախարարի կարծիքով, Երևանի ավագանին, լսելով հնչած կարծիքները, լրացուցիչ քննարկումներ կկազմակերպի:

«Ամեն պարագայում պետք է ավելի հանգիստ, հանդարտ անենք, ոչ թե ամեն ինչ զգացմունքային: Դա մեզ խանգարում է»,- ասաց Հ. Պողոսյանը:

Նախարարի դիտարկմամբ, գիտնականները պետք է լուրջ կշռադատեն, քննարկեն, պատմաբաններն իրենց լուրջ խոսքն ասեն. «Ժամանակ կա: Այդպես էլ կարվի»:

Միաժամանակ Հ. Պողոսյանը նշեց, որ հուշարձանը դրված չէ ու այդ հարցը մշակույթի նախարարության իրավասության շրջանակներից դուրս է:

Նախորդիվ՝

Միկոյանի և նրա հուշարձանի շուրջ

Միկոյանի հուշարձանի հարցով արտահերթ նիստ կհրավիրվի

Ճարտարապետը դեմ է Միկոյանի արձանը տեղադրելու որոշմանը, գրողն էլ դա համեմատում է Թալեաթի արձանը դնելու հետ (Տեսանյութ)